Қылышласыў: Спортшыларымыз Жәҳән кубогында гүмис медальды қолға киргизди

Алжирда спорттың қылышласыў түри бойынша жаслар арасында жәҳән кубогының гезектеги басқышы өткерилди.

Қызлар арасында сабля жөнелисинде өткен жарыс Өзбекстан сайланды командасы ушын жеңисли жуўмақланды.

Өзбекстан Миллий олимпиада комитетиниң мәлим етиўинше, жерлеслеримиз жарыс даўамында
Египетти 45:32, Италияны 45:43 есапта жеңди. Бирақ, шешиўши беллесиўде жасларымыз франциялы теңлеслерине 40:45 есабында жеңилди.

Усы тәризде спортшыларымыз жарыста гүмис медальды жеңип алды.

Жәҳән кубогында Зайнаб Дайибекова, Севинч Исмоилова, Айсулыў Уснатдинова ҳәм Гүлбану Есемуратовалар мәмлекетимиздиң абырайын қорғады.

Еслетип өтемиз, Өзбекстан Денетәрбия ҳәм спорт министрлиги ҳәм Миллий олимпиада комитетиниң шөлкемлестириўинде 2019-жылдың жуўмақларына бағышлап өткерилген «Миллий спорт сыйлығы – 2019» сыйлықлаў мәресиминде Олимпиада ҳәм миллий спорт түрлери бойынша Нөкис жоқары шеберлик мектебиниң тәрбияланыўшысы Зайнаб Дайибекова «Ең жақсы жас ҳәм перспективалы спортшы» номинациясының жеңимпазы болды.

Сондай-ақ, А.Уснатдинова ҳәм Г.Есемуратовалар да Олимпиада ҳәм миллий спорт түрлери бойынша Нөкис жоқары шеберлик мектебиниң тәрбияланыўшылары есапланады.

Дерек "Zaman.uz"

Бөлимлер