Қарақалпақстанлы жас кино дөретиўшилер «Янги нигоҳ» фестивалында

Ташкентте өткерилип атырған жаслар ҳәптелиги шеңберинде Жаслар дөретиўшилик орайында қысқа метражлы фильмлер тамашагөйлерге усынылмақта. Telegraf.uz дың хабарына қарағанда, фестивалға республикамыздың ҳәр қыйлы аймақларында дөретиўшилик пенен шуғылланып атырған профессионал ҳәм ҳәўескер жас кино дөретиўшилерден 100ге шамалас арза келип түскен.

Бул жаслардың арасында қарақалпақстанлы жаслар, Бердақ атындағы Қарақалпақ мәмлекетлик университети журналистика бағдарының студентлери Сәрбиназ Турешова ҳәм Сәрбиназ Қудайбергеновалар да бар екенлиги айырықша мақтанышлы.

Фильмлер тәжирийбели кино дөретиўшилер тәрепинен көрип шығылады ҳәм олардың 16сын тамашагөйлердиң дыққатына усынады.

Жеңимпазлар идеяның оригиналлығы ҳәм актуаллығы, жоқары көркемлилик дәрежеси, қызықлы сюжет, кино тилиниң өзине тән болған усылы, новаторлық ҳәм излениў, режиссёрлық ҳәм операторлық жаңалықлар, актёрлардың атқарыўшылық шеберлиги сыяқлы категориялар бойынша анықланады.

Мағлыўмат ушын, фестивалдың өткен жылғы бағдарламасында қарақалпақстанлы жас журналист ҳәм режиссёр Тимур Уразов жеңимпаз болған еди.

Ислам МАТЕКОВ таярлады.

Бөлимлер