Спортшыларымыз халықаралық турнирден 17 медал пенен қайтты

Хызмет ўазыйпасын атқарыў пайытында қаза болған арнаўлы әскерий бөлим хызметкерлериниң естелиги ушын қол урысы бойынша Ташкент қаласында болып өткен XV халықаралық турнирде республикамыз спортшылары 2 алтын, 7 гүмис, 8 қола медалын қолған киргизип, әжайып жеңис пенен қайтты. Бул олардың Өзбекистан Республикасы Конституциясы қабыл етилгениниң 24 жыллығы байрамына ылайықлы саўғасы болды.

Елимиздиң барлық ўәлаятларынан, сондай-ақ, Қазақстан, Түркменистан, Тәжикстан, Қырғызстан, Аўғанстан, Иран, Россия, Молдова, Украина мәмлекетлеринен ўәкиллер қатнасқан бул жарыста өз салмақ категорияларында Шынаргүл Айбергенова, Нурлыбек Насыров биринши, Аман Ғаниев, Мөлдир Қалилаева, Камила Ғайбуллаева, Дастан Алламбергенов, Шерзод Жуманазаров, Элеонора Қолдасбаева, Жамбыл Қуўатбаев екинши, Абдимажид Касымов, Наргиза Пирназарова, Расул Сапарбаев, Баҳадыр Қайыпназаров, Айзада Юсупова, Сулыўхан Ережепова, Улбосын Маўлимова ҳәм Дәстан Жалғасов үшинши орынларды ийеледи.

— Турнирде ең күшли спортшылар қатнасты,-дейди Нөкис юридика колледжиниң оқыўшысы Элеонора Қолдасбаева. — Өзим 75 килограмм салмақта қатнасып, Тәжикстан, Түркменистан, Россия спортшылары үстинен жеңиске ерисип, финалға жоллама алдым. Финалда Ташкент қаласы спортшысы менен болған кескин беллесиўде упайлар бойынша жеңилиске ушырап, гүмис медаль менен сыйлықландым. Буның ушын республикамыз Ҳуқық қорғаў уйымлары қол урысы федерациясының тренерлерине өз миннетдаршылығымды билдиремен.

Нөкис темир жол вокзалында халықаралық турнирдиң жеңимпазларын ҳәм олардың тренерлерин күтип алыў салтанаты болды. Онда Қарақалпақстан Республикасы Мәденият ҳәм спорт ислери министриниң орынбасары А.Турданов, Қарақалпақстан Республикасы Ҳуқық қорғаў уйымлары қол урысы федерациясының бас тренери Ж.Пирназаров ҳәм басқалар шығып сөйлеп, спортшыларымызды бул жеңиси менен қутлықлады.



 

Бөлимлер