«ЖАС ЖУРНАЛИСТ» ТАҢЛАЎЫ ЖЕҢИМПАЗЛАРЫ АНЫҚЛАНДЫ

«Журналист дегенде ҳәр қандай қыйыншылықлы жағдайларға қарамастан, өмирдиң қайнаған орынларында өз тынышлығы ҳәм басының аманлығын гиреўге қойып болса да ҳақыйқатлық ушын гүрес алып баратуғын мәрт ҳәм батыр инсанлар көз алдымызға келеди», - деген еди Биринши Президентимиз И.Каримов. Ҳақыйқатында да, жәмийетлик пикирди қәлиплестирип, мәмлекетлик ҳәкимият ҳәм жәмәәтшилик арасындағы муўапықластырыўшы өлшем бола алатуғын, халық пенен пикирлесиўди әмелге асыратуғын жетилискен социаллық институт – журналистика болып есапланады.

Профессионал журналист кадрларды таярлаў мәселесинде республикамызда 3 жоқары оқыў орны ишинде Бердақ атындағы Қарақалпақ мәмлекетлик университети журналистика кафедрасының да орны гиреўли. Кафедрадан ҳәр жылы 25-30 профессионал, жоқары билимге ҳәм көнликпелерге ийе болған жас журналист кадрлар питкерип шығып, өндириске жол алады.

Журналистика халықтың, жәмәәттиң айнасы. Онда ҳәр бир инсан өзиниң сәўлесин көриўи керек. Буның ушын журналист кадрларды таярлаўда заманагөй билимлендириў усыллары менен бирге, әмелий көнликпелерди де пайда етип барыў мәселеси әҳмийетли болады. Әсиресе, болажақ журналист бул кәсиптиң жуўапкершилигин терең түсиниўи, халық арасына кирип барыў тәжирийбесине ҳәм жәмийетлик пикирди қәлиплестире алатуғындай материалларды топлап, қайта ислеп, ғалаба хабар қураллары арқалы жәриялаўды жақсы меңгерген болыўы керек. Буның ушын университеттиң журналистика каферасында өткен жылдан берли «Жас журналист» таңлаўын өткериў дәстүрге айланды. Таңлаўда журналистика бағдарында оқып атырған студентлер ҳәм магистрантлар 10 номинация бойынша жыл даўамында ислеген мийнетлери, таярлаған материаллары менен қатнасып, ылайықлы баҳаланады.

Таңлаўдың быйылғы жылдағы бағдарламасы да Қарақалпақстан Республикасы Журналистлер аўқамы ҳәм «Камолот» ЖЖҲ Қарақалпақстан Республикасы Кеңеси менен биргеликте шөлкемлестирилип, онда студентлер «Ең жақсы баспасөз материалы», «Ең жақсы радио материал», «Ең жақсы теле материал», «Ең жақсы Интернет материалы», «Ең белсенди әмелиятшы студент», «Ең жақсы сын материал», «Ең жақсы фотофакт» «Университет ҳаққында жазылған ең жақсы мақала», «Балалар ушын ең жақсы дөретпе», «Ең көп материал жәриялаған студент» номинациялары бойынша өз имканиятларын сынап көрди.

- Жәмийетлик сын пикир тек ғана кемшиликлерди көрсетип берип қоймай, оны дүзетиўге де бағдарлайды. Мен де болажақ журналист сыпатында өзимди ҳәм көпшиликти ойландырып жүрген темаларда сын мақалалар жазып, таңлаўда усы номинация бойынша қатнастым. Мийнетлеримниң нәтийжеси сыпатында таңлаўда жеңимпаз болдым, - дейди 3-курс студенти, таңлаўдың «Ең жақсы сын материал» номинациясы жеңимпазы А.Әжимуратов.

- Таңлаўды жыл сайын өткерип барыўды ҳәм болажақ журналистлерди ҳәр тәреплеме қоллап-қуўатлаўды мақсет етип қойыппыз. Быйылғы жылы таңлаўды жыл жуўмақлары бойынша өткериўди мақул деп есапладық. Таңлаўды өткериўден гөзленген мақсет, болажақ журналистлердиң кәсибине болған сүйиспеншилигин ҳәм жуўапкершилигин арттырыў, олардың қәнигелесиўи ушын тийкарларды жаратыўдан ибарат, - дейди журналистика кафедрасының баслығы З.Оразымбетова.

Таңлаў жуўмағына бола төрешилер тәрепинен ең жақсы деп табылған журналистлик материал авторлары жеңимпаз деп табылды ҳәм оларға университет жәмәәти ҳәм «Камолот» ЖЖҲ басланғыш шөлкеми тәрепинен таярланған диплом ҳәм баҳалы саўғалар тапсырылды.

 

Ислам МАТЕКОВ,

ҚМУ «Камолот» ЖЖҲ басланғыш шөлкеми жетекши қәнигеси.

Бөлимлер