Ш.Мирзиёев: «Ҳәр сапары айтаман – төменге түсиңлер!»

Өзбекистан Республикасы Президенти Шавкат Мирзиёев 20-январь күни Қарақалпақстанға келди. Ол бул жердеги жағдай менен жақыннан танысты ҳәм халық пенен сәўбетлести.

Шавкат Мирзиёев Хожели районындағы емлеўханалар, меҳрийбанлық үйлерин көрип шықты. Сондай-ақ, усы аймақта жайласқан 69-мектепке барды. Оның әтирапы, класс ханалары, спорт залы, улыўма мектеп жумысы менен байланыслы барлық тәреплер Президент итибарынан шетте қалмады. Мектеп билимлендириўин раўажландырыўға байланыслы көплеген усыныслар ортаға тасланды. Мәмлекет басшысы мектептеги шәраятларды айтыў менен бирге көзге тасланып атырған айырым кемшиликлерды сын баҳалап, оларды тезлик пенен сапластырыў бойынша өзиниң пикирлерин билдирди. Ысытыў системасы, қарақалпақ тилиндеги китаплардың кем екенине итибарын қаратты. Сондай-ақ, Президент ушрасыў өткерип онда әҳмийетли мәселелер додаланды.

Төменде Президент сөзлерин келтиремиз.

«Биз бүгин ҳақыйқый аўҳалды үйрендик. Ҳақыйқый аўҳал жүдә жаман десек, бул әстен айтылған гәп болады. Ҳәзирги шәраят талапқа улыўма жуўап бермейди. Мен ҳәзирге шекем өзиме келе алмай атырман: мүриўбет үйине бардық – ол жердеги жағдай ҳәм бул жердеги басшылардың бәлентпәрўаз сөзлери адамды ойландырады, әлбетте.

Мен ҳәр қашан айтаман – қойымшылыққа, мириўбет үйлерине қарайық, қанша-қанша пуллар бердик, қанша итибар бердик, бирақ мың өкинишлиси, усы мириўбет үйи мысалында билсек болады, еле атқарыў органлары басшыларының ең үлкенинен кишкенесине шекем аяғы жерден үзилгени ҳәм төменге түспегени – ҳақыйқат. Иноятов усы жерде ме? Ҳәким-ғо яхшы – көзи көрмейди, аяғы жерден үзилген, бүгин жумыстан алынды, сиз-не? Ҳәр сапары айтаман – төменге түсиңлер, төменге түсиңлер… ҳәмме ушып жүрипти-ғо! Бул жердеги министриңиз ким? Сиз қашаннан берли ислеп атырсыз? Неге аўҳал бундай, айтың? Қанша-қанша пуллар берилди, тарқатып жибергенсиз, бир де бир терек екпегенсиз, мектептиң әтирапын абаданластырмағансыз, суўық болса, ханалардың ишине кирип болмаса, руўҳыйлық болмаса… мың өкинишлиси, пулларды сизге усаған атқарыў органы басшылары урлаған десек, дурыс болады. Ата-ана қалай сизге перзентлерин исенеди? Хожели ең үлкен район болса… Министриңизди не деп услап отырыпсыз? Өзиңиз, орынбасарларыңыз Ташкентте не деп ислеп отырсыз?
Мектеп, бақша – ең үлкен жеримиз. Еле жоқары оқыў орнын көремиз. Базы бир министрлеримизге дем алыс күни жүриў жақпайтуғын шығар, бирақ министр ҳәм министр орынбасары кишкене лаўазым емес! Өзбекистанның ертеңги күнин ким ойлайды? Абдуҳакимов, алдын бул сизге қараслы еди, мине қандай «мийрас» қалдырғансыз! Улыўма бүгинги аўҳал: бир жақсы жол көрмедим, бир жақсы имарат көрмедим, бир балалар бақшасын көрмедим… Тек бир нәрсе қуўандырады – адамларда үмит бар, исеним бар», - деди мәмлекетимиз басшысы.

Бөлимлер