Фармацевтика саласында жергиликли кәрханалар тәрепинен 459,4 миллиард сумлық өним ислеп шығарылды

Нөкис қаласында «Өзфармсанаат» акционерлик концерни менен Өзбекистан Республикасы Денсаўлықты сақлаў министрлигиниң шөлкемлестириўинде республикамыздың халқын жергиликли кәрханаларда ислеп шығарылған дәри-дәрмақ қураллары ҳәм медициналық буйымлар менен тәмийинлеўди жақсылаўға бағышланған республикалық көргизбе өткерилди.

Оған Ташкент қаласының, Наўайы, Бухара, Хорезм ўалаятларының дәри-дәрмақ ҳәм медициналық буйымларды ислеп шығарыўшы ири кәрханалары және олардың өнимлерин сатыў менен шуғылланатуғын кәрханалардың ўәкиллери, тийисли министрликлердиң, шөлкемлердиң басшылары, қалалық ҳәм районлық медицина бирлеспелериниң қәнигелери, ғалаба хабар қуралларының хызметкерлери қатнасты. Илажды Қарақалпақстан Республикасы Денсаўлықты сақлаў министриниң биринши орынбасары Қ.Камалов алып барды.

Атап өтилгениндей, Өзбекистан Республикасында 2014-2016-жылларда фармацевтикалық өнимлерди ислеп шығарыўды раўажландырыў ушын шет ел ҳәм жергиликли инвестициялар жәрдеминде 120,09 миллион АҚШ доллары муғдарындағы 55 жойбар әмелге асырылды.

Өзбекистанда бүгинги күни фармацевтика санааты менен шуғылланыўшы жергиликли 145 кәрхана болып, соның 85 и дәри, 8 и диагностика, 52 си медициналық буйымлар ислеп шығармақта. Олар өткен жылы 1 триллион 21 миллиард сумлық 2138 түрдеги өним ислеп шығарды.

Фармацевтика саласында жергиликлестириў бағдарламасы тийкарында өткен жылы жергиликли кәрханалар тәрепинен 459,4 миллиард сумлық өним ислеп шығарылды. 2009-жылы 745,9 мың АҚШ доллары муғдарындағы дәри қураллары ҳәм медициналық буйымлар экспорт етилген болса, өткен жылы бул көрсеткиш 16 миллион 400 мың АҚШ долларынан асып кетти. Олардың баҳасы шет елде ислеп шығарылған дәри өнимлеринен әдеўир арзан ҳәм халықаралық стандарларға толық сәйкес келеди.

- Бүгинги көргизбеге бизлер кәрханамызда ислеп шығарылатуғын 23 түрдеги иньекциялық, 32 түрдеги таблеткалық дәри-дәрмақлар ҳәм 49 түрдеги ҳәр қыйлы медициналық буйымлар менен қатнасып атырмыз. Олардың баҳасы шет елде ислеп шығарылған дәри өнимлеринен әдеўир арзан ҳәм халықаралық стандартларға толық сәйкес келеди. Өткерилген илажда басқа да бир қатар өндирислик кәрханалардың жумыслары менен танысып, тәжирийбе алмастық,-дейди «Uzgermed pfarm» ААЖ бирлескен кәрханасының менеджери М.Аширова. Халыққа хызмет көрсетиўде бирге ислесиўди күшейтип, алған тәжирийбелеримиз бенен билимлеримизди аямаймыз деп, исендиремиз.

Илажда «Uzgermed pfarm», «Bagil medical New Technology», «ATM pfarm», «Nobel pfarmsanoat» сыяқлы бир қатар кәрханалардың көргизбели шығыўлары болды. Қатнасыўшылар олар тәрепинен таярланатуғын өнимлер менен танысып, өзлерин қызықтырған сораўларға жуўап алды.

Ә.Жиемуратов,
Қарақалпақстан хабар агентлигиниң хабаршысы.

Диққат, диққат!  KRuz.uz сайтини Telegram'даги канал, Instagram'даги саҳифа ва  Facebook'даг гуруҳ орқали кузатиб боринг!

Бөлимлер