Шоманай фермерлерине жаңа техникалар тапсырылды

Өзбекистан Республикасы Президенти Шавкат Мирзиёев орынларда социаллық-экономикалық реформалардың барысы, халқымыздың турмыс дәрежесин буннан былай да арттырыў жумыслары менен танысыў мақсетинде усы жылдың 20-21 январь күнлери республикамызға сапары ўақтында Шоманай районында да болған еди. Халық пенен ушырасып, өз-ара пикирлесип, олардың турмыс дәрежесин жақсылаў, районды социаллық-экономикалық жақтан раўажландырыў, хызмет көрсетиўдиң сапасын буннан былай да жақсылаў бойынша тийисли тараў басшыларына қатаң ўазыйпалар белгилеп берди.

Арадан көп ўақыт өтпестен, Президентимиздиң «2017-2021-жылларда Аралбойы аймағын раўажландырыў мәмлекетлик бағдарламасы ҳаққында»ғы қарары қабыл етилип,  оның орынланыўын тәмийинлеў шеңберинде кең көлемли жумыслар баслап жиберилди. Бурын хабар етилгениндей, жақында районда халыққа транспорт хызметин көрсетиўши “Shumanay Gold Ekspres” ҳәм “Shumanay Vega Trans”  жәмийетлери ашылып, оларға 10 дана «Isuzu», 15 дана «Damas»  автомобили шәртнама тийкарында берилди. Бүгинги күни бул автомобильлер  жолаўшылардың алысын жақын етип, халыққа сапалы хызмет көрсетпекте.

Жақында район фермерлери турмысында қуўанышлы ўақыя жүз берди. Райондағы «Айдана Жеменей», «Баршынай Ҳүрлиман», «Саламат Көшкинбаев», «Сейтжан Жамалов», «Тәжимурат Өтебаев» фермер хожалықларына «Ўзмашлизинг» жуўапкершилиги шекленген жәмийетинен лизинг тийкарында алып келинген бес дана «Арион-630с» маркалы жаңа жоқары өнимдарлы сүрим тракторы салтанатлы жағдайда тапсырылды.

Усы мүнәсибет пенен өткерилген илажда Қарақалпақстан Республикасы Аўыл ҳәм суў хожалығы министри Д.Қайпов, Өзбекистан Республикасы Бас прокуратурасы басқарма баслығының орынбасары М.Абдуҳакимов, район ҳәкими Б.Янгибаев шығып сөйлеп, Ҳүрметли Президентимиздиң басламасы менен район халқының турмыс дәрежесин жақсылаў, хызмет көрсетиўдиң сапасын арттырыў, тийкарғы тараў есапланған аўыл хожалығы, соның ишинде, фермерлик ҳәрекетин қоллап- қуўатлаў бойынша көрсетилип атырған айрықша итибар және ғамқорлыққа тоқтап өтти.

Атап өтилгениндей, район бойынша 345  фермер хожалығы болып, соннан 275 и пахташылық ҳәм ғәллешилик, 24 и шарўашылық,  3 фермер хожалығы балықшылық, 1 фермер хожалығы пал ҳәррешилиги менен шуғылланады. Өткен жылы 243 гектар майданға гүзлик бийдай егилип, агротехникалық илажлар бойынша тәрбия жумыслары алып барылды.

Лизинг тийкарында алып келинген жаңа тракторлар аўыл хожалығы дақылларынан алынатуғын зүрәәтлиликти арттырыўға, егис және тәрбия жумысларын белгиленген мүддетте сапалы байытыўға, солай етип шәртнамалы режени артығына орынлаўға  хызмет етеди.

 

Д.АБИБУЛЛАЕВ

Бөлимлер