БМШ Тахтакөпир, Шоманай ҳәм Мойнақта ҳаял-қызларға семинарлар өтеди

Қарақалпақстан Республикасының үш районында жасаўшы 150 ден артық ҳаяллар – ҳаял-қызлар исбилерменлигин раўажландырыў бойынша семинар-тренинглерде қатнасады. Бул ҳаққында Бирлескен миллетлер шөлкеминиң (БМШ) Раўажланыў бағдарламасының Өзбекистандағы ўәкилханасы хабар берди, деп жәриялады daryo.uz.

БМШ ның Қоспа «Аралбойы аймағы ушын инсан қәўипсизлиги бойынша көпшерикли фондын шөлкемлестириў арқалы Арал теңизи кризисинен зыян көрген халықтың турмыс шәраятын жақсылаў ҳәм беккемлеў» бағдарламасында белгиленген -Тахтакөпир, Мойнақ ҳәм Шоманай үлгили районларында ҳаяллар ушын семинарлар шөлкемлестирмекте. Семинарларға тек ғана үй хожалығы жумысы менен бәнт болып қалған ҳәм өз бизнесин ашыў, қәнийгелигин өзгертиў нийетинде болған жергиликли ҳаял-қызлар мирәт етиледи.

Үйретиўши семинарлар интерактив көргизбелер көринисинде өткериледи. Өзбекистан исбилермен ҳаяллар бирлеспеси «Тадбиркор аёл»дың Қарақалпақстан бөлими мәсләҳатшилери исбилерменликтиң имканиятлары ҳәм келешеги, қарыйдарлар менен жумыс алып барыўдың өзине жараса тәреплери, тәжирийбесин арттырыў бойынша курслар ҳәм жаңа өнерментшилик көнликпелерине ийе болыў ҳаққында өз тәжирийбелерин айтып береди.

Тренинг қатнасыўшылары бизнести алып барыў, исбилерменликти қалай баслаў, SWOT-анализи, дәслепки қаржыны қәлиплестириў тийкарлары менен танысады. Буннан тысқары, исбилерменлик жумысының шөлкемлестириў-ҳуқықый түрлери мәселелери, шаңарақлық бизнести жаратыў, жеңиллетилген кредитлерди алыў мүмкиншиликлери, есабатларды тапсырыў, салықлар, сондай-ақ, бизнес режени ислеп шығыў мәселелерин үйренеди.

Семинарлар 9-10, 14-15, 23-24-март күнлери болып өтеди.

Дерек: makan.uz

Бөлимлер