10 лаўазымлы шахс ҳәкимшилик жуўапкершиликке тартылды

Өзбекистан Республикасы «Тутыныўшылардың хуқықларын  қорғаў ҳаққында»ғы Нызамы талапларының орынланыўын қадағалаў ўазыйпасы Қарақалпастан Республикасы Меншиклестириў, монополиядан шығарыў ҳәм бәсекиликти раўажландырыў комитетине жүклетилген.

Өз ҳуқықларын жақсы билген тутыныўшылар, бузылған ҳуқық ҳәм мәплерин тиклеў мақсетиндеги Комитетке берген мүрәжатлары нызамшылықта белгиленген талапларға муўапық үйренип шығылып атыр. Олардың дерлик 70-80 проценти тутыныўшылардың пайдасына шешилмекте.

Мәселен, Нөкис қаласы турғыны Р.Қочқарованың электр тәмийнаты кәрханасы тәрепинен қарыздарлық ушын ескертиў берместен электр тармағынан ажыратып кеткенлиги ҳәм қайта жалғаў ушын 74887,5 сум қарыздарлық есапланғанлығына наразылығы бойынша мүрәжаты үйренип шығылды. Нәтийжеде,  тармақтан ажыратқанлығы ҳәм қайта жалғаў ушын 74887,5 сум төлениўи бойынша дүзилген актти бийкар етиў бойынша Комитеттиң арнаўлы комиссиясы шешими менен электр тармақлары кәрханасына көрсетпе берилди.

Комитет тәрепинен тутыныўшылардың ҳуқықларын қорғаў ҳаққындағы нызамшылық ҳүжжетлери талаплары бузылыў жағдайларын сапластырыў бойынша 13 хожалық жүргизиўши субъектке көрсетпелер берилди ҳәм 10 лаўазымлы шахс ҳәкимшилик жуўапкершиликке тартылды.

Республикамызда тутыныўшылар ҳуқықларын қорғаў мәмлекет сиясатының тийкарғы бағдарламасы болып белгиленген. Комитетимиздиң усы бағдарлама бойынша алып барып атырған ис-илажлары халқымыздың абадан турмыста жасаўына, республика экономикасының раўажланыўына белгили дәрежеде үлесин қосыўда хызмет ететуғынлығына исеним билдиремиз.

А.ШАГИЛОВА,

Қарақалпақстан Республикасы Меншиклестириў, монополиядан шығарыў ҳәм бәсекиликти

раўажландырыў комитети бас қәнигеси.

Бөлимлер