Автотранспорт қуралларына қысыл­ған газ ушын газ баллонларын орнатыў ҳәм сервис хызметин көрсетиў орайы пайдаланыўға тапсырылды

Нөкис қаласында ҳәр жылы абаданластырыў, қурылыс тараўында жүз берип атырған жаңалықлар, пайтахтымыз жамалының көркейиўине үлес қоспақта. Әсиресе, елимизде ҳәр қандай байрам салтанатлары қарсаңында барлық тараўларда жаңадан имаратлар қурыў ямаса жумыс орынларын жаратыў дәстүрге айланып бармақта. Буның ай­қын мысалы — жақында қаланың кирер дәрўазасы есапланған қубла автовокзал тәрепинде Автотранспорт қуралларына қысыл­ған газ ушын газ баллонларын орнатыў ҳәм сервис хызметин көрсетиў орайы пайдаланыўға тапсырылды.

«Ўзтрансгаз» акционерлик компаниясы ҳәм «Үргеништрансгаз» сыңар кәрханасының буйыртпасы тийкарында бул хызмет көрсетиў орайдың улыўма баҳасы 3 миллиард 319 миллион сум болып, қурылыс жумыслары «Хорезмгазқурылысмонтаж» унитар кәрханасының қурылысшылары тәрепинен алып барылды.

— Қурылыс жумыслары өткен жылдың август айында басланып, буған жәмийетимиздиң, сондай-ақ, Қарақалпақстан Республикасындағы бир қатар газ қурыў тараўы кәрханаларының қурылысшылары қатнасты. Халқымыздың ийгилигине хызмет ететуғын бундай орайдың питкерилиўине үлес қосқанымыз ушын қуўанышлымыз,-дейди қурылыс кәрханасының баслығы Рустам Вафоев.

«Узтрансгаз» акционерлик компаниясына қараслы Авторанспорт қуралларына қысыл­ған газ ушын газ баллонларын орнатыў ҳәм сервис хызметин көрсетиў орайын пайдаланыўға тапсырыў салтанатын Нөкис қаласы ҳәкими Ж.Опаев ашып берди. Буннан соң тараў басшылары шығып сөйлеп, хызмет көрсетиў орайының қурылыс жумысларын алып барған қурылыс кәрханасына өзлериниң миннетдаршылықларын билдирди ҳәм бунда белсендилик көрсеткен бир топар қурылысшыларға естелик саўғаларын тапсырды.

Жаңадан салынып, пайдаланыўға тапсырылған бул орай жылына 1500 дана автотранспорт қуралларына хызмет көрсетиў қуўатлылығына ийе болып, бунда 30 дан аслам жаңа жумыс орынлары жаратылады ҳәм келешекте халқымыздың мүтәжликлерин толық қанаатландыратуғынына исенемиз.

Р.АРЗИЕВ, "Еркин Қарақалпақстан" газетаси

Бөлимлер