Қарақалпақстанда 12 түрдеги өним пайдаланыўға жарамсыз деп табылды

Ислеп шығарыўшы кәрханалардың өнимлериниң сапасын муўапықластырыўда Қарақалпақстан Сынаў ҳәм сертификатластырыў орайы мәмлекетлик кәрханасының тут­қан орны айрықша екенлигин атап өтиўимиз керек.

Кәрханамыз хызметкерлери исбилерменлер менен ислеп шығарыўшылардың мүрәжатларын өз мүддетинде көрип шығып, сертификатластырыў мақсетиндеги өнимлердиң сынаўларын  сапалы орынлап, ишки базарлардағы тутыныўшыларды сапасыз өнимлерден қорғаў бойынша өзлериниң алдына қойған ўазыйпаларын булжытпай орынлап келмекте. Орайымыз аккредитленген сынаў комплекси  Oz Dst ISO/IEC 17025-2007 халықаралық стандарты менен аккредитлан­ленген болып, оның қурамында физика-химиялық көрсеткишлерди сынаў лабораториясы (азық-аўқат, аўыл хожалығы өнимлери), кем қуўатланған электр үскенелерин сынаў ҳәм автотранспортларды сынаў лабораторияларынан ибарат комплексимиз қәнигелери усы тараў бо­йынша терең билимге ийе өз исиниң маманлары болып табылады. Олар ҳәр үш жылдан Ташкент қаласында «Стандартластырыў, метрология ҳәм сертификатластырыў» тараўы бойынша илимий-изертлеў институтында өз билимлерин жетилистирип келмекте. Өткен жылы орай лабораториялары тәрепинен республикамыз бойынша  150 мыңнан аслам сынаў өткизилип, 5758 сынаў баянламасы рәсмийлестирилди ҳәм соннан 12 түрдеги өним пайдаланыўға жарамсыз деп табылды. Жарамсыз деп табылған өнимлерге жарамсызлығы ҳаққында сынаў баянламасы рәсмийлестирилди.

Сондай-ақ, соңғы жыллары лабораторияларымызды заманагөй әсбап-үскенелер менен үскенелеўге айрықша итибар берилмекте ҳәм бул бойынша ҳәр жылы «Өзстандарт» агентлиги бас директоры тәрепинен «Аймақлық сынаў ҳәм калибровкалаў лабораторияларын және де раўажландырыў реже бағдарламасы»на муўапық ҳәр жылы заманагөй үскенелер менен тәмийинлеп атыр. Кәрханамыз тәрепинен исбилерменлик субъектлериниң аўырын жеңил етиў ҳәм оларға қолайлықлар жаратыў, республикамызда өндирис кәрханаларының өнимлерин  өзлеримизде сынаўдан өткериў мақсетинде үйрениў жумыслары алып барылды ҳәм усы тийкарда лабораториялардың аккредитация көлемлери кеңейтилип барылмақта. Атап айтқанда, автомобильлерге суйылтылған газ қуйыў шақапшаларын сертификатластырыў бо­йынша сынаўларын өзимизде өткериў мақсетинде, нефть-газ өнимлерин сынаў лабораториясы шөлкемлестирилди ҳәм лаборатория ушын заманагөй үш детекторлы газли хроматограф сатып алынды. Бул суйылтылған газлердиң ГОСТ-27577-2000 норматив ҳүжжети бойынша жети көрсеткишин қысқа мүддетте анықлаўға имканият бермекте. Бурын бундай сынаўларды Ташкент қаласындағы «Махсус энерго» ЖШЖ ҳәм де Хорезм ўәлаятындағы лабораториялардан сынаўдан өткерип атыр еди. Ал, 2018-жылы болса, орайымызда электротехника өнимлери сынаўларын толық қамтыў мақсетинде өзимизде кем қуўатланған электр үскенелерин сынаў лабораториясын заманагөй приборлар менен тәмийинлеў режелестирилмекте.

Т.АРЗЫЎОВА,

Қарақалпақстан Сынаў ҳәм сертификатластырыў орайы мәмлекетлик кәрханасы сынаў комплекси баслығы.

Kruz.uz сайтини Telegram'даги каналимиз орқали кузатиб боринг

Бөлимлер