Нөкистеги аймақлық көргизбе де 2 миллиард 50 миллион сумлық шәртнамалар дүзилди

Өзбекистан Республикасы Президентиниң 2008-жыл  15-июльдеги «Инновациялық жойбарларды ҳәм технологияларды өндириске енгизиўди хошаметлеў бойынша қосымша илажлар ҳаққында»ғы қарарына муўапық, ҳәр жылы мәмлекетимизде инновациялық идеялар, технологиялар ҳәм жойбарлар республикалық ярмаркаларының өткерилиўи дәстүрге айланған.

28-март күни пайтахтымызда Қарақалпақстан Республикасы ҳәм Хорезм ўәлаяты бойынша аймақлық «Х Инновациялық идеялар, технологиялар ҳәм жойбарлар» ярмаркасы болып өтти.

Көргизбе шеңберинде Өзбекистан Республикасы Минис­трлер Кабинети Илим ҳәм технологияларды раўажландырыўды муўапықластырыў комитети, Жоқары ҳәм Орта арнаўлы, кәсиплик билимлендириў бас­қармасы, Аўыл ҳәм суў хожалығы министрлиги менен бир қатар шөлкемлердеги илимий-изертлеў ҳәм тәжирийбе-конструкторлық шөлкемлериниң технологиялық қолланбалары усынылды.

Илимий техникалық раўажланыўды жетилистириў ҳәм оннан өнимли пайдаланыўды шөлкемлестириў мәмлекетимиз экономикасын раўажландырыўдың тийкарғы бағдарларының бири саналады. Солай екен, ислеп шығарыўда технологиялардың бәсекиге шыдамлылығын жетилистириў, инновациялық өнимлердиң ишки ҳәм сыртқы базарларға алып шығарылыўын тәмийинлеў, импорт өнимлердиң өзимизде ислеп шығарылатуғын товарлар менен алмастырыў, экспортқа бағдарланған экономикалық системаны жаратыў бүгинги дәўир талабы  болып табылады.

Ярмарканы Қарақалпақстан Республикасы Министлер Кеңесиниң Баслығы Қ.Сариев ашты. Буннан соң сөзге шыққан Өзбекистан Республикасы Министрлер Кабинети Илим ҳәм технологияларды раўажландырыўды муўапықластырыў Комитети атқарыў аппараты баслығы О.Парпиев, Хорезм ўәлаяты ҳәкимлиги жанындағы аймақлық инновациялық хызмет ҳәм технологиялар трансфери орайы директоры Б.Рузметов ҳәм Өзбекистан Республикасы Илимлер академиясы Қарақалпақстан Республикасы бөлиминиң баслығы Н.Айымбетовлар илаж қатнасыўшыларын қутлықлап, алымларымыздың илимий изленислери, жаратып атырған жаңалықлары  фермер хожалықлары, санаат кәрханалары ҳәм шөлкемлер, киши бизнес ҳәм исбилерменлик субъектлери ушын енгизген бундай инновациялық қолланбалары келешекте  елимиздиң абаданлығы жолында хызмет ететуғынлығын айрықша атап өтти.

Аймақлық көргизбе шеңберинде өз-ара мәпдар тәреплердиң  улыўма баҳасы 2 миллиард  50 миллион сумлық шәртнамалар дүзилди.

— Бүгинги көргизбеге институтымыз сегиз жойбар менен қатнасып атыр. Қарақалпақстан шараятында жергиликли аўыл хожалығы шығындыларынан пайдаланып, керамикалық гербиш ислеп шығарыў жойбарын усынып атырмыз. Буның пайдалы тәрепи жыллылықты жақсы услап энергияның үнемлениўине ерисиледи,- дейди Ташкент архитектура-қурылыс институты илимий излениўшиси Алланазар Ильясов.

Көргизбеде Қарақалпақстан Республикасы Министрлер Кеңеси тәрепинен бес номинация бойынша яғный санаат, медицина ҳәм фармакология, пән ҳәм билимлендириў, аўыл хожалығы ҳәм хабар технологиялары бағдарындағы белсенди қолланба авторлары, сондай-ақ, Өзбекистан Республикасы Министлер Кабинети жанындағы Илим ҳәм технологияларды раўажландырыўды муўапықластырыў комитети ҳәм Саўда Санаат палатасы Республикалық басқармасы тәрепинен белсенди қатнасыўшылар  Ҳүрмет жарлықлары менен сыйлықланды.

З.ЕРЕКЕЕВА

Kruz.uz сайтини Telegram'даги каналимиз орқали кузатиб боринг

Бөлимлер