Екинши жәҳән урысы қатнасыўшылары GM Uzbekistan автомобиллерин нәўбетсиз алады

Өзбекистан Республикасы Бас министри Абдулла Арипов Президенттиң 2017-жыл 4-апрельдеги «Еслеў ҳәм қәдирлеў күнине таярлық көриў ҳәм оны өткериў илажлары ҳаққында»ғы ПҚ-2865-санлы қарарында белгиленген ўазыйпалар орынланыўын сөзсиз тәмийинлеў мәселелерине арналған видеоселектор жыйналыс өткерди. «Makan.uz» берген мағлыўматқа қарағанда, илажға Қарақалпақстан Республикасы, ўәлаятлар, район ҳәкимликлери ҳәм басқа тийисли мекемелер басшылары қатнасқан.

Жыйналыста мәлим етилиўинше, ҳәзирги ўақытта республикада 1542 урыс ветераны жасап атыр. Президент қарарына муўапық олардың ҳәр бирине 2 млн сўм муғдарындағы бир мәртелик пул сыйлығы ҳәкимлер, кең жәмийетшилик қатнасыўында салтанатлы түрде тапсырылады. Бул пулларды тапсырыў системасы қандай шөлкемлестирилгени ҳаққында Финанс министри Ботиржон Хўжаев мағлыўмат берди.

Буннан тысқары, “Ўзавтосаноат” АЖ баслығы орынбасары урыс ветеранларына GM Uzbekistan қоспа кәрханасында ислеп шығарылып атырған ҳәр қандай түрдеги автомашиналарды бир мәрте нәўбетсиз алыў мүмкиншилиги берилип атырғаны ҳаққында мағлыўмат берген.

Яғный, Екинши жәҳән урысы қатнасыўшылары, оларға теңлестирилгенлер бул мүмкиншиликтен бир мәрте пайдаланыўы мүмкин. Бунда айтылыўынша, урыс ветеранына, өзине ямаса жақынлары, ағайин-туўысқанлары ямаса ақлықларынан қәлегенине бир мәрте бир дана автомобильди нәўбетсиз сатып алыўына рухсат бериўши сертификатлар усы жылдың 20-апрель күнине шекем тапсырылады.

«Кун.uz» дерегиниң берген мағлыўматына қарағанда, мәҳәллелер усынған мағлыўматлар тийкарында урыс ветеранына хызмет етиўи тастыйықланған қоңсысы ямаса бийгана шахс болған хызметшилерге де усындай имканият бериледи. Бул автомобиллерге биринши ҳәм екинши техник хызметлер бийпул көрсетиледи, аўсық бөлеклери бийпул бериледи.

Бөлимлер