Берунийде 37 аўыл пуқаралар жыйынының баслықлары ҳәм олардың 333 кеңесгөйи сайланады

Усы жылдың май-июнь айларында пүткил елимиз бойлап пуқаралардың өзин-өзи басқарыў уйымларына жаңа мүддетке пуқаралар жыйынлары баслықлары (ақсақаллары) ҳәм олардың кеңесгөйлерин сайлаў болып өтеди.


Ҳәзирги ўақытта орынларда усы сайлаўды шөлкемлестириў ҳәм өткериўге көмеклесиўши комиссиялар және жумысшы топарлар дүзилип, сайлаўды жоқары шөлкемлескенлик жағдайында өткериў бойынша ушырасыўлар өткерилип, түсиндириў жумыслары алып барылмақта. Жыйын аймағында жасаўшы халықтың сайлаўға қатнасатуғын ўәкиллери анықланып, оларға нызамшылық тийкарында бул сиясий мапаздың әҳмийети ҳәм мақсети бойынша кең түрде түсиниклер берилмекте.

Мине, усындай илаж Беруний районы ҳәкимиятының мәжилислер залында болып өтти. Оған райондағы мәкеме ҳәм кәрханалардың, шөлкемлердиң ҳәм өзин-өзи басқарыў уйымларының басшы ҳәм қәнигелери қатнасты.
Атап өтилгениндей, бул илажлар ҳәрекеттеги нызамлар ҳәм сайлаўға байланыслы қабыл етилген Илажлар режеси тийкарында алып барылмақта. Ҳәзирги ўақытта сайлаўды өткеретуғын орынлар анықланып, олар сайлаўға байланыслы көргизбели қураллар ҳәм басқа да зәрүр үскенелер, инвентарьлар менен тәмийинленбекте.
Районда 177 мыңнан аслам халық жасайды. Ҳәрекет етип турған 37 аўыл пуқаралар жыйынының баслықлары ҳәм олардың 333 кеңесгөйи сайланады. Сайлаўға қатнасатуғын көше ўәкиллериниң дизими алынып, олар менен түсиник жумыслары алып барылмақта.

Бөлимлер