Климатлық турақлылықты тәмийинлеў ҳаққинда семинар болып өтти

Жақында Бирлескен Миллетлер Шөлкеминиң Раўажланыў бағдарламасы, Бейимлесиў қоры ҳәм Өзбекистан Республикасы ҳүкиметиниң биргеликтеги шөлкемлестириўи менен «Өзбекистанның қурғақшылық районларындағы фермер ҳәм дийқан хожалықларында климатлық турақлылықты тәмийинлеў» жойбары тийкарында «Ландшафт дәрежесинде климаттың өзгериўине байланыслы аўыл халқының қатнасыўындағы ийкемлесиў илажларын әмелге асырыўдың тийкарлары» атамасындағы семинар болып өтти.

Семинар жумысына БМШ Раўажланыў бағдарламасының Өзбекистандағы ўәкилханасы қәнигелери, жойбардың министрлик, комитетлер, кәрхана ҳәм мәкемелер аралық исши топар ағзалары, Мәмлекетлик Тоғай хожалығы басқармасы қәнигелери, илимпаз ҳәм студентлер, мәмлекетлик емес коммерциялық емес жәмийетлик шөлкемлер ҳәм ғалаба хабар қураллары ўәкиллери қатнасты. Онда дәслеп жойбардың мақсет ҳәм ўазыйпалары ҳаққында илаж қатнасыўшыларына жойбар баслығы А.Меркушин кең түрде түсиник берип өтти. Буннан соң аўыл хожалығы илимлериниң докторы, академик З.Новицкий, Саяманлы бағшылық ҳәм тоғай хожалығы республикалық Илимий-өндирислик Орайы директоры, профессор Б.Тухтаев, жойбардың ландшафт дәрежесиниң қәнигеси, биология илимлериниң кандидаты А.Тилеўмуратов ҳәм басқалар сөзге шығып, видеос­лайдлар жәрдеминде баянатлар жасады. Онда атап өтилгениндей, жойбар еки жылдан берли өз жумысын баслаған ҳәм климаты кескин болған республикамыздың Мойнақ, Тахтакөпир, Шымбай, Кегейли ҳәм Қанлыкөл районлары таңлап алынып, бул районларда климат өзгериўи нәтийжесинде пайда болып атырған зыянлы ақыбетлерди жумсартыў ҳәм климат өзгериўи бойынша бейимлесиў ҳәрекетлерин анықлаў көзде тутылған.

— Жойбар тийкарғы дыққатты өсимликлерди өсириў ҳәм шарўашылық пенен шуғылланыўшы дийқан ҳәм фермер хожалықларының климатлық ийкемлесиўине қаратады. Онда алға қойылған илажлар ҳәм ҳәрекетлер усы регионда жер ресурслары өнимдарлығының кемейиўи ҳәм суў менен тәмийинлеў машқалаларының шешимин табыўда жәрдем береди,-дейди бизге жойбар баслығы Александр Меркушин.

Семинар соңында қатнасыўшыларға жоқарыда атап өтилген мәселелер бо­йынша ҳүжжетли фильм көрсетилип, олар өзлериниң баҳалы пикир-усынысларын билдирди.

Г.САПАРОВА.

А.ҚАННАЗАРОВтың түсирген сүўрети

Бөлимлер