«Кегейли экстракт» Өзбекистан-Қытай қоспа кәрханасы иске түсти

Соңғы жыллары елимизде ҳүким сүрип турған тынышлық, сиясий турақлылық ҳәм экономикалық өсим, санаат, киши бизнес кәрханаларын шөлкем­лес­тириў ушын жаратылған қолайлылық сырт ел инвесторлары арасында айрықша қызығыўшылық оятпақта ҳәм олар менен биргеликте қоспа кәрханалар шөлкемлестирилмекте.

Тахтакөпир районы ийелеген майданы жағынан республикамыздағы ең ири аймақлардың биринен есапланады. Тийкарынан аўыл хожалығы өнимлерин жетистиретуғын бул районда  ҳәрқыйлы мәдений ҳәм жабайы өсимликлер тәбийғый ҳалда өсип жетилиседи. Әсиресе, солардың арасында дәрилик өсимлик есапланған боянның тутқан орны айрықша ҳәм оған деген талап бүгинги күни дүнья еллеринде күннен-күнге артып бармақта. Соны есапқа алған елимиз исбилерменлери боян өсимлигин егип жетилистирип, оны қайта ислеўге айрықша дыққат қаратып, орынларда сырт ел инвесторлары менен биргеликте қоспа кәрханалар шөлкемлес­тирип, шийки зат өнимлерин экс­портқа шығармақта. Усындай кәрханалардың бири жақында Тахтакөпир районында да жумыс баслады.

— Президентимиз ҳәм республика ҳүкиметиниң исбилерменлик субъектлерине жаратып берген қолайлықлары нәтийжесинде район аймағында жайласқан «Қуўанышжарма» ирригация тармақлары басқармасының балансында болған, бурын қараўсыз қалған бос имаратты 420 мың АҚШ долларлық инвестиция киргизиў жолы менен ноль баҳада сатып алып, ол жерде қурылыс жумысларын басладық,-дейди жаңадан иске түсирилген «Кегейли экстракт» Өзбекистан-Қытай қоспа кәрханасы директорының орынбасары Темирхан Хожалепесов. — Боян тамырын қайта ислеўге керек болған заманагөй үскенелерди орнатып болған соң март айынан жумысты баслап, боян экс­трактын Қытай Халық Республикасына экспорт етиўди басладық. Жаңа технологияларды меңгериўде ҳәм өнимлердиң сапасын қадағалаўда жергиликли жигитлерге қытайлы Ху Йонгпенг ҳәм Ни Суитао өзиниң ис тәжирийбесин үйретип келмекте. Алдағы ўақытлары боян тамырларды тек фермерлерден сатып алмастан, оны өзлеримиз де 2 мың гектар майданға егип жетилистириўди режелестирип қойыппыз. Буның ушын район ҳәкимлигинен жер сорап мүрәжат еткенбиз...

Ҳақыйқатында да, ҳәзирги ўақытлары  50 адам жумыс пенен тәмийинленген бул кәрханада шийки затты қайта ислеў жумыслары қызғын алып барылмақта. Әсиресе, исбилерменлерге Өзбекистан Республикасы Президентиниң 2017-жыл 17-марттағы «Қарақалпақстан Республикасы ҳәм Хорезм ўәлаятында исбилерменлик жумысларын алып барыў ушын қосымша қолайлы шараятлар жаратыў ҳаққында»ғы қарары айрықша күш-жигер бағышлап, олардың ертеңги күнге деген исенимин арттырмақта.

Ә.ОРАЗОВ, өз хабаршымыз.

Тахтакөпир районы.

Диққат, диққат!  KRuz.uz сайтини Telegram'даги канал, Instagram'даги саҳифа ва  Facebook'даг гуруҳ орқали кузатиб боринг!

Бөлимлер