Тақыятасда урыс қатнасыўшысына турақ жай саўға этилди

Өзбекистан Республикасы Президентиниң усы жыл 4-апрельдеги «Екинши жер жүзилик урыс қатнасыўшыларын хошаметлеў ҳаққында»ғы пәрманы, «Еслеў ҳәм қәдирлеў күнине таярлық көриў ҳәм оны өткериў илажлары ҳаққында»ғы қарарының орынланыўын тәмийинлеў бағдарында екинши жер жүзилик урыс қатнасыўшысы Режеп Қурманмедовқа Хожели районы Тақыятас қаласы «Халықлар дослығы» мәкан пуқаралар жыйыны аймағындағы 1-киширайон 2-жайдан үш ханалы турақ жай саўға етилди.

Усы мүнәсибет пенен Қарақалпақстан Республикасы Жоқарғы Кеңесиниң Баслығы М.Ерниязов ветеранның шаңарағында болып, жаңа турақ жайдың гилтин, 9-май улыўмахалықлық байрам — Еслеў ҳәм қәдирлеў күни, сондай-ақ, 1941-1945-жыллардағы Екинши жер жүзилик урыста фашизм үстинен ерисилген жеңистиң  72 жыллығы менен Президентимиздиң қутлықлаўын, естелик саўғасын, Өзбекистан Республикасы Президенти атынан 2 000 000 (еки миллион) сум муғдарында бир мәртелик ақшалай  хошаметти салтанатлы жағдайда тапсырды. Сондай-ақ, «Нураный» қоры,  Қарақалпақстан кәсиплик аўқамлары бирлеспе Кеңеси, район ҳәкимлиги атынан саўғалар тапсырылды.

— Биз урыс қатнасыўшыларына қөрсетип атыр­ған ғамқорлығы ушын Президентимизге, республикамыз басшыларына шексиз миннетдаршылық билдиремиз,-дейди нураный атамыз Режеп Қурманмедов. —Бүгингидей тыныш ҳәм бахытлы турмысымыздың қәдирине жетиўимиз тийис...

Усы күни Қарақалпақстан Республикасы Жоқар­ғы Кеңеси Баслығының орынбасары А.Ҳамраев, жәмийетлик шөлкемлердиң, район ҳәкимлигиниң ўәкиллери район аймағындағы екинши жер жүзилик урыс қатнасыўшылары Нурылла Исаков, Рейимбай Қалмуратов ҳәм Жаңабай Өтәмбетовлардың ҳал жағдайларынан хабар алып, оларға Президентимиздиң қутлықлаўын оқып еситтирди ҳәм бир мәртелик ақшалай  сыйлығын тапсырды.

Бөлимлер