#XotiraUz Урыс ҳәм мийнет ветераны Генжемурат ата Алланиязов

Екинши  дүнья  жүзилик  урыс  хал­қымыз тарийхында  өшпес  из  қалдырды. «Урыста жеңимпазлар болмайды, бирақ қаҳарманлар болады» дегениндей, елимиздиң  тынышлығы  ушын  гүрескен усындай еркин ҳәм пәраўан күнлеримиз себепкерлери болған нураныйларымыз алдында ҳәмийше бас ийе­миз.  Генжемурат ата Алланиязов та урыс қатнасыўшысы. Ол   жас  болыўына  қарамастан  көкирегин  қалқан  етип, заманласлары  менен  бирге Шымбай  районы  комиссариаты  тәрепинен  1943-жылы  фронтқа  атланды. Әскерий  таярлықтан соң 3-Украина фронтынан Суворов  атындағы 59-гвардия  дивизиясының  83-батальонында Полтава  қаласын  душпанлардан  азат  етиўде өзиниң  бар  күшин  аямады.

1944-жылы миномётшилер  таярлайтуғын  курста  6 ай  оқып, сержант  дәрежесин алды. Шығыс Европаның көплеген қалаларында саўашларда қатнасты. Жарақатланып госпитальға  түскенде де  көп  узамай аяққа турып, және урысқа атланды. Генжемурат ата барлық  ўақыт  алдынғы  қатарда  турып,  өзиниң  мәртлигин  көрсетти. Жети жылдан соң 1950-жылы 28-февральда елимизге аман-есен қайта оралды. Оның урыста  көрсеткен ерликлери бир неше жаўынгерлик орден медальлар менен сыйлықланды.

Урыстан соңғы жыллары ол өзиниң билимин жетилистириў мақсетинде Нөкис мәмлекетлик педогогикалық институтының рус тили ҳәм әдебияты  факультетине  оқыўға  кирди ҳәм институтты табыслы  тамамлайды. Узақ жыллар Қараөзек районындағы 15-санлы мектепте оқыўшыларға устазлық етти. Ҳәр байрамда мектеп жәмәәти Генжемурат атаның  үйине барып, ҳал-жағдайынан хабар алады. Ата урыста ана топырағымызды душпанлардан  қутқарыўда ўатанласларымыз көрсеткен мәртлик, қыймас жоғалтыўлар, көрген  қыйыншылықларын қайғы   менен  еске алады, бүгинги тыныш, абадан заманымызға шүкиршилик етеди.

Ҳәзир  атамыз  93 жаста, 5 ул ҳәм 5 қызды тәрбиялады,   ҳәммеси де  жоқары  мағлыўматлы, жәмийетте өз орнына ийе инсанлар. Перзентлерине аталық мәсләҳәтин берип, ҳәмийше дуўаға қол жая­туғын атамыз Қараөзек  районы  бойынша   екинши  жер жүзилик  урысқа  қатнасқан бирден-бир теберик инсан. Илайым, өмир жасы узақ болып, перзентлери рәҳәтин көргей деп, жақсы тилеклер тилеймиз!

Н.НУРНИЯЗОВА, Қараөзек  районы  32-санлы  мектеп  оқытыўшысы.

Erkinkarakalpak.uz

Диққат, диққат!  KRuz.uz сайтини Telegram'даги канал, Instagram'даги саҳифа ва  Facebook'даг гуруҳ орқали кузатиб боринг!

Бөлимлер