Данияров Сайлаўбай Мойнақ районыҳәкими лаўазымына тайынланди

Усы жыл 4-май күни Халық депутатлары Мойнақ ра­йонлық Кеңесиниң гезексиз жигирма екинши сессиясы болып өтти.

Сессияның күн тәртибинде шөлкемлестириў мәселеси қаралды.

Ҳақыйқатында да экологиялық қыйыншылықтан бас­қалардан көре көбирек жәбир шегип атырған Мойнақ ра­йоны тиккелей Президентимиздиң дыққат-итибарында болып, бул аймақ халқының турмыс дәрежесин арттырыў бағдарында айрықша ғамқорлықлар көрсетилмекте.

Сессияда шығып сөйлеген Қарақалпақстан Республикасы Жоқарғы Кеңесиниң Баслығы М.Ерниязов районды социаллық, экономикалық жақтан раўажландырыў бағдарында алып барылып атырған жумыслар, орын алып атыр­ған кемшиликлер, оларды сапластырыў бойынша алда тур­ған ислениўи тийис ўазыйпалар ҳаққында кең түрде айта келип, бар имканиятлардан толық пайдаланыўда анық ҳәм айқын ўазыйпалар белгиледи. Республика басшысы район ҳәкими лаўазымына Қарақалпақстан Республикасы Экономика министри болып ислеп келген Данияров Сайлаўбай Сапарбаевичтиң кандидатурасын усынды. Усынылған талабанды районлық Кеңестиң бир қатар депутатлары қоллап-қуўатлап шығып сөйледи.

Сессияда С.Данияров Мойнақ районы ҳәкими болып тастыйықланды ҳәм билдирилген исенимди ақлаў ушын өзиниң билим және тәжирийбесин районды ҳәр тәреплеме гүллеп-раўажландырыўға, халықтың турмыс дәрежесин және де арттырыўға жумсайтуғынлығын билдирип өтти.

Сессия жумысына Өзбекистан Республикасы Президенти Аппаратының жуўаплы хызметкери М.Махкамов қатнасты ҳәм шығып сөйледи.

Усының менен сессия өз жумысын жуўмақлады.

Бөлимлер