Валюта алып өтиў тәртибин билмекши болсаңыз...

Өзбекистан Республикасының Биринши Президентиниң 1998-жыл 20-марттағы «Физикалық шахслардың нақ шет ел валютасын алып кириў ҳәм алып шығыўын тәртипке салыў ис-илажлары ҳаққында»ғы Пәрманына тийкар қабыллан­ған инструкция Өзбекистан Республикасы Әдиллик министрлиги тәрепинен l999-жыл 7-майда 7l6-сан менен дизимге алынған ҳәм нақ шет ел валютасын Өзбекистан Республикасына алып кириў ҳәм алып шығыў тәртибин белгилейди.

Ал, Әдиллик минис­трлигиниң 2016-жыл 26-августтағы 716-5-сан менен дизимнен өткерилген Өзбекистан Республикасы Мәмлекетлик бажыхана комитети ҳәм Өзбекистан Республикасы Орайлық банки басқармасының қарарлары менен физикалық шахслар тәрепинен нақ шет-ел валютасын Өзбекис­тан Республикасына алып кириў ҳәм алып шығыў тәртиби ҳаққындағы инструкцияға айырым өзгерислер киргизилген. Бирақ, валютаны алып шығыў тәртиби әўелгидей өзгериссиз қалды. Атап айтқанда, резидент­лер, Өзбекистан Республикасында турақлы жасаў орнына ийе болған Өзбекистан Республикасы пуқаралары, сондай-ақ, резидент емеслер яғный, сырт ел пуқаралары ҳәм пуқаралығы болмаған шахслар көрсетпеге муўапық төмендеги нақ шет ел валютасын Өзбекистан Республикасынан сыртқа алып шығыўы мүмкин.

а) 2000 АҚШ доллары эквивалент муғдары шеңберинде рухсатнама алмастан:

б) 2000 АҚШ долларына тең муғдардан артық сумма — Өзбе­кистан Республикасы Орайлық банки яки ўәкилликли банклердиң 09006-санлы формадағы рухсатнамасы менен:

в) 5000 АҚШ долларына тең муғдардан артық сумма — Өзбекистан Республикасы Орайлық банкиниң 09006-1-санлы формадағы рухсатнамасы менен Өзбекистан Республикасы бажыхана шегарасы арқалы резидент ҳәм резидент емеслер тәрепинен алып кирилип атырған ҳәм алып шығылып атырған шет ел валютасы оның жолаўшы бажыхана декларациясында жазба түрде декларацияланыўы шәрти менен өткериледи:

г) Резидент емеслерге-бажыхана декларациясына муўапық Өзбекистан Республикасына алып келген сумма шеңберинде. Соның менен бирге, Өзбе­кистан Республикасына киргендеги бажыхана декларациясында белгиленген суммалардан зыят нақ шет-ел валютасын алып шығыўға Орайлық банк ямаса ўәкилликли банклердиң рухсатнамасы менен жол қойылады.

Бажыхана бақлаўы пайытында анықланған қәлбеки нақ шет ел валютасы өткерилмей услап қалынады ҳәм Нызамда белгиленген тәртипте рәсмийлестириледи.

 

А.АБЫЛОВ,

«Хожели» шегара бажыхана посты аға инспекторы,

бажыхана хызмети капитаны.

Erkinkarakalpak.uz

Бөлимлер