Нөкисли оқыўшылар — биринши орынды ийелледи

Өткен ҳәптеде Нөкистеги Мухаммад ибн Ахмад ал-Беруний орта арнаўлы билим журтында Өзбекистан мусылманлары басқармасына қараслы билим дәргайлары талабалары арасында дәстүрге айланған «Бәркамал әўлад» спорт ойынларының Өзбекистан көлеминдеги басқышы болып өтти.

«Қарақалпақавтодизельсервис» жуўапкершилиги шекленген жәмийети (баслығы — Оразбай Жийемуратов) ағзалары тәрепинен қысқа мүддетлерде қурып питкерилген, көлеми 12х24 метр болған, барлық қолайлылықларға ийе заманагөй спорт зал имаратында болып өткен «Бәркамал әўлад — 2017» спорт ойынларында Ташкент, Бухара, Хорезм, Қашқадәрья, Әндижан, Наманган ҳәм Нөкис қалаларында жайласқан орта арнаўлы ислам билим журтларының ҳәм Ташкент ислам институтының талаба жаслары спорттың шахмат, гүрес, стол тенниси ҳәм тас көтериў түрлери бойынша өз-ара күш сынасты.

Спорт беллесиўлериниң ашылыў мәресиминде Өзбекистан Республикасы Дин ислери бойынша комитети Тәлим бөлиминиң баслығы С.Шерхонов, Өзбекистан мусылманлары басқармасы Тәлим ҳәм кадрлар таярлаў бөлиминиң баслығы А.Дўсматов, Қарақалпақстан Республикасы Дене тәрбиясы ҳәм спорт  бойынша мәмлекетлик комитети баслығы Ғ.Байниязов, Қарақалпақстан мусылманлары қазыятының қазысы, Мухаммад ибн Ахмад ал-Беруний орта арнаўлы билим журты директоры Ш.Баўатдинов елимизде халықтың денсаўлығын беккемлеў, өсип кия­тырған жас әўладтың ҳәр тәреплеме саламат болып камалға келиўинде дене тәрбиясы ҳәм спорттың тут­қан орнына айрықша тоқтап өтип, жарыс қатнасыўшыларын қутлықлаў менен бирге оларға табыслар тиледи. Буннан соң жарысларға старт берилди.

Соны айрықша атап өтиў керек, ҳәр бир команда, олардың қурамындағы ҳәр бир талаба-спортшының ойынларға айрықша таярлықлар менен келгенлиги көринип турар еди. Еки күн даўам еткен қызықлы ҳәм тартыслы беллесиўлер жуўмағында әўмет күшлилерге күлип бағып, жеңимпазлар анықланды. Шахмат бойынша қызлар арасында өткерилген беллесиўлерде Ташкент ислам институтының 2-курс студенти Ҳавасхан Акбарова биринши орынды жеңип алған болса, екинши ҳәм үшинши орынлар Ташкент қаласындағы Хадичаи Қубро ҳаял-қызлар орта арнаўлы ислам билим журты (ОАИБЖ) 3-курс талабасы Робия Маннопова ҳәм Бухара қаласындағы Жўйбори Калон ҳаял-қызлар ОАИБЖ 2-курс талабасы Рисолат Қадирқуловаларға несип етти. Стол тенниси бойынша Хадичаи Қубро ҳаял-қызлар ОАИБЖ 2-курс талабасы Муаттар Мирзаева, Жўйбори Калон ҳаял-қызлар ОАИБЖ 2-курс талабасы Зиннура Наимова ҳәм Ташкент ислам институтының 2-курс оқыўшысы Гүлрух Махамедовалар сыйлы орынларды ийеледи.

Ер балалар арасында өткерилген беллесиўлер көпшиликтиң дыққатын өзине тартты. Шахмат беллесиўлеринде Бухара қаласындағы Мир Араб ОАИБЖ 2-курс талабасы Бабур Охуновқа тең келетуғын спортшы табылмады. Екинши орынды Наманган қаласындағы Ҳидоя ОАИБЖ 3-курс талабасы Рахматулла Алтынбаев, үшинши орынды болса Нөкис Мухаммад ибн Ахмад ал-Беруний ОАИБЖ 3-курс талабасы Төлеген Нызаматдиновлар қолға киргизди. Стол тенниси бойынша қатнасқан Нөкис Мухаммад ибн Ахмад ал-Беруний ОАИБЖ 1-курс талабасы Ильяс Әметниязов өз командасына дәслепки алтын медальды алып берди. Финалда оннан жеңилген Ҳидоя ОАИБЖ 4-курс талабасы Абдулҳамид Умаров гүмис медаль менен шекленген болса, үшинши орын Ташкент ислам институтының 4-курс оқыўшысы Ғуламжан Холбоевқа несип етти. Тас көтериўшилер сынағында Ташкент ислам институтының 3-курс оқыўшысы  Есенгелди Нызаматдинов жеңимпаз атанды. Екинши ҳәм үшинши орынларды Нөкис Мухаммад ибн Ахмад ал-Беруний ОАИБЖ 4-курс талабасы Рахимжан Тлеўбаев пенен Мир Араб ОАИБЖ 4-курс талабасы Бахтияр Холиқуловлар ийеледи. Палўанлар беллесиўиндеги нәтийжелер төмендегише болды: 1. Оралхан Ҳамидов — Хожа Бухарий ОАИБЖ (Қашқа­дәрья), 2. Байрам Мырзабаев — Нөкис Мухаммад ибн Ахмад ал-Беруний ОАИБЖ, 3. Акмалхан Мырзарахматов — Ҳидоя ОАИБЖ.

 

Улыўма командалық есапта Нөкис Мухаммад ибн Ахмад ал-Беруний ОАИБЖ жәмәәти биринши орынды ийелеген болса, Ҳидоя ОАИБЖ екинши, Ташкент ислам институты ҳәм Мир Араб ОАИБЖ командалары үшинши орынларды қолға киргизди. Жеңимпазлар ҳәм сыйлы орын ийелери шөлкемлестириўшилер тәрепинен таярлан­ған кубок, медаль, диплом ҳәм баҳалы саўғалар менен сыйлықланды.

erkinkarakalpak.uz

Диққатдиққат!  KRuz.uz сайтини Telegram'даги канал, Instagram'даги саҳифа ва  Facebook'даги гуруҳ орқали кузатиб боринг!

Бөлимлер