Қарақалпақстан Республикасы Әдиллик министри: "Айыплы лаўазымлы шахсларға 5 ҳәкимшилик жуўапкершиликке тартыў бойынша усыныслар киргизилди"

Министрлик тәрепинен хожалық жүргизиўши субъектлер тәрепинен дүздирилген ҳәм дүзилип атырған шәртнамалардың, соннан сыртқы ҳәм ишки шәртнамалардың нызамлы дүзилиўи ҳәм орынланыўын әмелий жәрдем көрсетиў жолы менен үйрениў, қадағалаў, анықланған кемшиликлер, шәртнама талапларын бузған ҳәм бузылыўына жол қойған лаўазымлы шахслардың жуўапкершилигин күшейтиў бойынша үйрениўлер өткерилип, хожалық жүргизиўши субъектлердиң нызамлы мәплери тәмийинленбекте.

Қарақалпақстан Республикасы Әдиллик министрлиги тәрепинен Өзбекистан Республикасы Әдиллик министрлигиниң 2017-жыл биринши ярым жыллық ис режесиниң 20-бәнтиниң орынланыўын тәмийинлеў мақсетинде усы жылдың январь-март айларында «Өзпахтасанаат» акционерлик жәмийети қурамына киретуғын пахта тазалаў кәрханалары жумысында фермер хожалықлары менен контрактация шәртнамалардың дүзилиўи ҳәм орынланыўында нызам ҳүжжетлери талапларына әмел етилиўи аўҳалы үйренип шығылды.

Үйрениўлер нәтийжесинде «Өзпахтасанаат» АЖ қурамына кириўши пахта тазалаў кәрханалары искерлигинде шәртнамалардың дүзилиўи, орынланыўы ҳәм басқа ҳалатлар бойынша 2015-жылда 1181, 2016-жылда 1367 қәте-кемшиликлерге жол қойыл­ғанлығын көрсетти. Сондай-ақ, үйрениў даўамында пахта тазалаў кәрханалары тәрепинен 2016-жылдың зүрәәти ушын пахта шийки затын тапсырған 559 фермер хожалықларына 3 миллиард 541 миллион 212 мың сум қаржылар усы жылдың 15-февраль күнине дейин төлеп берилмегени мәлим болды. Негизинде пахта шийки заты ҳәм туқымлық пахта сатып алыў бойынша контрактация шәртнамасының 4.3 бәнтинде хожалыққа жеткерип берилген өним қунының 90 проценти есабынан терим ушын берилген пуллар ҳәм қәрежетлер шегирилгеннен қалған бөлеги 2016-жылдың 31-декабрине дейин төлеп берилиўи белгиленгенлигине қарамастан, жәмийет тәрепинен усы күнге дейин 559 фермер хожалықларына 3 миллиард 541 миллион 212 мың сум төлеп берилмеген.

Соның менен бир қатарда, «Әмиўдәрья пахта тазалаў заводы» АЖ тәрепинен 425 фермер хожалығына 3036,5 миллион сум, «Хожели пахта тазалаў заводы» АЖ тәрепинен 109 фермер хожалығына 415,2 миллион сум, «Хал­қабад мамығы» АЖ тәрепинен 26 фермер хожалығына 89,4 мил­лион сум қаржы өткерилип берилмеген.

Усы көрсетилген қарыздарлықларды фермер хожалықларына қайтарыў мақсетинде минис­трлик тәрепинен Қарақалпақстан Республикасы Хожалық судына 2 миллиард 654 миллион 570 мың 470 сумлық 241 даўа арзалары киргизилди ҳәм айыплы лаўазымлы шахсларға 5 ҳәкимшилик жуўапкершиликке тартыў бойынша усыныслар киргизилди. Бул киргизилген даўа арзалар толық қанаатландырылды. Кемшиликлерге жол қойған 5 лаўазымлы шахсларға ҳәкимшилик жуўапкершилик баянламасы рәсмийлестирилди ҳәм 20 шахс бойынша интизамий жаза қолланылды.

Буннан тысқары, минис­трлик тәрепинен 2017-жылдың  8 шереги даўамында 31 усыныс, ҳәкимшилик жуўапкершиликке тартыў бойынша 5 усыныс киргизилди. Булар бойынша 2 миллиард 306 миллион 200 мың сум қаржылар фермер хожалықларының мәплерине шешилди. Булар­ға жол қойған ҳәмелдар шахс­ларға 30 интизамий, 5 шахсқа ҳәкимшилик жазалар қолланылды.

Жуўмақлап айтқанда, бул тараўдағы жумысларды және де жанландырыў, ҳәр бир социаллық-ҳуқықый мүнәсибетлерде Конституция ҳәм нызам үстинлигин тәмийинлеў, исбилерменлик жумысы субъектлерине нәтийжели юридикалық хызмет көрсетиў, олардың нызамлы мәплерин ҳәр тәреплеме қорғаў, әмелиятта ҳәр қандай бюрокра­тиялық тосқынлықларды саплас­тырыў, халқымызда исбилерменлик сана-сезимин қәлиплестириўге қаратылған ҳуқықый үгит-нәсият ислерин жаңа бас­қышқа көтериў министрлигимиздиң тийкарғы ўазыйпаларынан бири болып қалады.

Ж.САДЫҚОВ, Қарақалпақстан Республикасы Әдиллик министри.

Диққатдиққат!  KRuz.uz сайтини Telegram'даги канал, Instagram'даги саҳифа ва  Facebook'даги гуруҳ орқали кузатиб боринг!

Бөлимлер