Қосымша 400 жаңа имарат қурыў бойынша жумыслар баслап жиберилди

Президентимиз тәрепинен быйылғы жылдың «Халық пенен пикирлесиў ҳәм инсан мәплери жылы» деп жәрияланыўы ҳәм Журтбасшымыздың усы жыл 20-21-январь күнлери республикамызға келип, халық пенен пикирлесип, республикамызды социаллық-экономикалық жақтан раўажландырыў, инфраструктураны жақсылаў, қала ҳәм районларымызды абаданластырыў бойынша бир қатар усыныслар бергени көплеген тараўларда жумыслар барысына қызғын пәт ендирмекте.

Солардың қатарында Қарақалпақстан Республикасында 2017-жылдың бағдарламасына қосымша түрде 400 жаңаланған үлги жойбарлар тийкарында арзан турақ жайлар қурыў да нәзерде тутылған еди.

«Қишлоқ қурилиш инвест» ЖШЖ инжиниринг компаниясының Қарақалпақстан филиалы тәрепинен бул бағдардағы жумыслар баслап жиберилди. Олар тәрепинен Қарақалпақстан Республикасы мәмлекетлик архитектура ҳәм қурылыс комитети, район ҳәкимликлери менен бирликте 2017-жылдың бағдарламасына қосымша түрде 400 жаңаланған үлги жойбарлар тийкарында арзан турақ жайлар қурыў ушын массивлер таңланды. Қурылыс ушын арнаўлы жер ажыратыў бойынша қарарлар қабыл етилип, архитектуралық режелестириў тапсырмалары таярланды. Қурылысы режелестирилген массивлер бойынша ҳүжжетлер топламы Өзбекистан Республикасы «Давархитект­қурилиш» ҳәм «Ергеодезкадастр» комитети жанындағы жер таңлаў комиссиясына өткерилди.

«Қишлоқ қурилиш лойиҳа» ЖШЖ Қарақалпақстан филиалы менен бирликте жойбар-смета ҳүжжетлери таярланып, таңланған массивлерге бөлистириў жумыслары жуўмақланды ҳәм мәмлекетлик экспертиза жуўмақлары алынды.

Қурылыс жумыслары Әмиўдәрья районы Чайкўл массивиндеги «Юқори тулуға» АПЖда 60 дана, Қыпшақ массивиндеги «Бештом»  АПЖда 15 дана, Беруний районы Шаббаз массивиндеги «Асқар» АПЖда 35 дана,  «Хорезм» МПЖда 15 дана, Кегейли районы Ақтуба массивиндеги «М.Жуманазаров» АПЖда 12 дана, Қоңырат районы Мыңжарған МПЖда 50 дана, Елабад массиви «Елабад» елатында 5 дана, Нөкис районы Саманбай массиви «Узынкөл-3» АПЖда 37 дана, Арбашы массиви «Нөкис» АПЖда 8 дана, Төрткүл районы Шодлик МПЖда 60 дана, Шымбай районы «Конши» МПЖда 10 дана, Елликқала районы Елликқала массиви «Елликқала» АПЖда 25 дана, Сарабий массиви «Сарабий», Қырық қыз массиви «Қырық қыз» АПЖларында 10 данадан, жәми 352 дана бир қабатлы 2, 3 ханалы бир этажлы жайлардың қурылыс жумыслары алып барылады.

Ал, Қараөзек районы «Қутлымәкан» МПЖда, Кегейли районы Кегейли массиви «Кегейли» елатында, Тахтакөпир районы «Ғәрезсизлик» МПЖ ларында  2 қабатлы 4 подъездли 2, 3 ханалы 16 жайдан жәми 48 жай салынады.

— Бүгинги күнде 2017-жылдың бағдарламасына қосымша түрде 400 жаңаланған үлги жойбарлар тийкарында қурылатуғын арзан турақ жайлар ушын жеке тәртиптеги қурыўшылар (талапкерлер) анықланып, олар менен дәслепки шәртнамалар дүзилди ҳәм режедеги 6,8 миллиард сумлық дәслепки төлемлер толығы менен төленди.

Ҳәзирги ўақытта усы турақ жайлардың қурылыс-монтаж жумысларын орынлаў ушын қатнасатуғын қурылыс кәрханаларының дизими алынып, район ҳәкимликлериниң тийисли усыныслары жыйналмақта,-дейди филиал директоры А.Матыков.

Бул бағдардағы жумыслар еле даўам етпекте.

Бөлимлер