Шымбайда кийим жуўыў порошоги, газ плита ҳәм ыдыс-табақларды тазалайтуғын суйық өнимлер ислеп шығарылмақта

Жақында өндирис кәрханасы Шымбай районында да иске түсирилип, онда халқымыздың күнделикли тутыныўы ушын күтә зәрүр бол­ған кийим жуўыў порошоги, газ плита ҳәм ыдыс-табақларды тазалайтуғын суйық өнимлер ислеп шығарылмақта.

— Өткен жылы Шымбай экономика колледжин финанс қәнигелиги бо­йынша оқып тамамладым, - дейди усы жәмийет баслығы Мырзахан Қолдасбаева. — Район басшыларының исбилерменликке жаратып берип атырған қолайлықлары нәтийжесинде усы жылдың март айында «Агробанк»тиң 100 миллион сумлық жеңиллетилген кредит қаржылары есабынан Қытайдың заманагөй технологиясын алып келип орнаттық. Соңынан Ташкенттеги «Фарэнергохиммашсавдо»  жуўапкершилиги шекленген жәмийетиниң қәнигелери келип, кәрханамыз хызметкерлерин шийки заттан таяр өнимлер ислеп шығарыўды үйретип кетти. Алдағы ўақытлары өндирис көлемин еле де кеңейтип, кәрханамызда шампунь, антифриз ислеп шығарыўды режелестирип қойғанбыз...

Ҳақыйқатында да, «Озода» маркасы менен шығарылып атырған бул өнимлер ҳәзирги ўақытлары ишки базарда өз қарыйдарларын таўып, мүнәсип баҳаларын алмақта. Бул жас исбилерменниң күшине күш, жигерине жигер қосып, оны және де жаңа мақсетлерге қарай умтылдырмақта. Ең тийкарғысы, бундай заманагөй өнимлерди өзимизде ислеп шығарғанға не жетсин!!

Бөлимлер