Нөкис районына 38 км ишки суў тармақлары жаңадан қурылады

Нөкис район ҳәкимияты мәжилислер залында Өзбекистан Республикасы Президентиниң 2017-жыл 18-январь күнги «2017-2021-жылларды Аралбойы аймақларын раўажландырыў мәмлекетлик бағдарламасы ҳаққында»ғы қарарының орынланыўын тәмийинлеў мақсетинде Азия раўажландырыў банки тәрепинен Аралбойы аймағын таза ишимлик суўы менен тәмийинлеў бағдарындағы семинар мәжилиси болып өтти.
ТАЗА ИШИМЛИК СУЎЫ МЕНЕН ТӘМИЙИНЛЕЎ
Семинарға район ҳәкимияты шөлкемлестириў ҳәм қадағалаў топары баслығы Р.Нызашов, Азия раўажландырыў банки экологи М.Халмурзаева, социолог Г.Жапақова ҳәм мәкеме шөлкем баслықлары пуқаралар жыйынларының ўәкиллери қатнасты.
Семинарда Аралбойы аймағының экологиялық ҳәм социал-экономикалық жағдайы ҳәм халықтың жасаў шараятын жақсылаўға, Арал теңизиниң экологиялық апатшылық ақыбетин жумсартыў бойынша инвестиция жойбарларын өз ўақтында ҳәм нәтийжели әмелге асырыў, Аралбойы аймағындағы халықтың турмыс дәрежесин жақсылаў бағдарлары бойынша түсиниклер берилди.

Бүгинги күнде районымыз бойынша 223 км ишимлик суў тармақлары халыққа жеткерилип берилген. 2017-2021-жылларға мөлшерленген бағдарлама тийкарында олардан 94 км ишимлик суў тармақларына реконструкция жумыслары алып барылады ҳәм 38 км ишки суў тармақлары жаңадан қурылады. 

Келешекте әмелге асырылатуғын бундай жойбарлар халқымыздың абадан турмыс кешириўлери ушын олардың саламатлығын беккемлеўде үлкен орын тутады.

Aqmangittani.uz

Бөлимлер