«Үлкен Москва регатасы» халықаралық турниринде Қарақалпақстанлы спортшы 1 алтын ҳәм 1 гүмис медаль жеңди

«Үлкен Москва регатасы» халықаралық турнири академиялық ескек есиў спортындағы ең абырайлы жарыслардың биринен саналады. 1961-жылдан берли турақлы түрде өткерилип киятырған бул турнир тарийхына нәзер таслайтуғын болсақ, түрли жылларда онда қарақалпақстанлы спортшылардың да табыслы қатнасқанын көриўимиз мүмкин. Атап айтатуғын болсақ, 1976-жылы Виктор Кащеев турнир чемпионы атанған болса, 1997-жылы Баҳадыр Дәўлетияров ҳәм Владимир Грищенколар қола, Әбиўбәкир Узақбаев ҳәм Ерназар Ҳамидуллаевлар 2009-жылы алтын, 2014-жылы болса қола медальларды қолға киргизген. Олардың бундай жоқары көрсеткишлерин жақында, анығырағы, июнь айының басында және бир үмитли спортшымыз Исламбек Мәмбетназаров та тәкирарлады.

Быйыл елиў алтыншы мәрте өткерилген бул турнирде Өзбекистан сайланды командасы қурамында қатнасқан Исламбек 4 адамлық тақ ескекли қайықта финиш сызығын биринши болып кесип өткен болса, 2 адамлық қайықта гүмис медальды жеңип алды. «Үлкен Москва регатасы» халықаралық турнирине дүньяның 14 мәмлекетинен ең күшли академиялық ескек есиў шеберлери қатнасқанын есапқа алатуғын болсақ, Қарақалпақстан Республикасы суў спорты түрлери бойынша қәнигелестирилген балалар ҳәм жас өспиримлер спорт мектебиниң тәрбияланыўшысы Исламбек Мәмбетназаровтың бул көрсеткишлерин ең жоқары табыслардың бири сыпатында баҳалаў мүмкин.

Жерлесимиздиң бундай жетискенликке ерисиўинде оның устазлары — әкеси Муратбай Мәмбетназаров ҳәм Баҳадыр Дәўлетияровтың хызметлери айрықша болды.

С.ЖАНИЕВ. Erkinkarakalpak.uz

Диққат, диққат!  KRuz.uz сайтини ижтимоий тармоқларда кузатиб боринг

Бөлимлер