Жоқары оқыў орынларында қабыллаў басланды. Қаерде қандай жаңалық бар?

2017-жыл 15-июнь күни елимиздиң барлық  жоқары оқыў орынларында (әскерий ЖОО дан тысқары) 2017-2018-оқыў жылы ушын бакалавриат бағдарларына қабыллаў комиссиялары жумыс баслады.

Ҳүжжетлерди қабыллаў өткен жыллардағыдан бес күн бурын басланып, бес күн бурын жуўмақланады, бирақ тест имтиханларын өткериў мүддети өзгериссиз 1-август күни болып қалады.

Өзбекистан Республикасы Президентиниң усы жыл 5-майдағы  «2017-2018-оқыў жылында Өзбекистан Республикасының жоқары оқыў орынларына оқыўға қабыллаў ҳаққында»ғы қарарына муўапық мүддетли әскерий хызметти өтеп, усыныснама алып келген абитуриентлердиң тест имтиханларында жыйнаған баллының 50 проценти қосылады. Мәселен, имтиханнан 80 балл алса, жәми топлаған баллы 120 деп есапланады.

Қарақалпақстандағы жоқары оқыў орынларында сыртқы бөлим ашылмайды.

  1. Онлайн түрде ҳүжжет тапсырыў мүмкин.

Ҳүжжет тапсырыўдың бундай усылы өткен жылы-ақ қолға алынған еди.

Ташкент мәлимлеме технологиялары университети Нөкис филиалы быйылғы оқыў жылында бес бағдар бойынша жәми 200 студентти өз қушағына алады.

Мәлимлеме қәўипсизлиги (тараўлар бойынша) бағдарында 25, компьютер инжиниринг бойынша 75, бағдарламалық инжиниринг бағдарында 50, телекоммуникация технологияларында 25, МКТ (мәлимлеме коммуникация технологиялары) тараўында кәсиплик билимлендириў бағдарында 25 талабан студент болады. Соннан 55и  мәмлекетлик грант, 145и төлемли контракт тийкарында оқыйды. Быйыл бул жоқары оқыў орнына онлайн тәризде де ҳүжжет қабылланбақта. Бирақ веб-камераға сүўретке түсиў ҳәм ҳүжжетлердиң түп нусқаларын тапсырыў ушын абитуриенттиң өзи келиўи шәрт.

  1. НМПИде жаңа бакалавр бағдары ашылды.

Әжинияз атындағы Нөкис мәмлекетлик педагогикалық институты быйыл ҳәр жылғыдан 25 студент көп қабыллайды. Бул жоқары оқыў орнында жаңадан «Кәсиплик билимлендириў: дизайн»  бағдары ашылды. Оған мәмлекетлик грантқа 5, төлемли контракт тийкарында 20 студент қабылланады.

Институт быйыл жәми 23 бағдар бойынша мәмлекетлик грант тийкарында 425, төлемли контракт тийкарында 982 студентти қабыллайды.

Тест сынақларын шөлкемлескенлик пенен өткериў ушын ҳәзирден-ақ, 22 имарат таярлап қойылды. Институттың бес имаратында, 1-3-6-9-11-12-15-29-31-32-37-38-санлы орта мектеплерде ҳәм пайтахтымыздағы педагогика, 2-санлы санаат ҳәм хызмет көрсетиў, мелиорация ҳәм суў хожалығы кәсип-өнер колледжлеринде жәми 400 ге шамалас аудитория тест сынақларына таяр ҳалына келтирилди.

Ескертип өтемиз, “супер контракт” лер яғный грантқа илесе алмай қалған, төлемли контрактлердиң дизиминде дәслепки орынларда турған  ҳәм төлемди бир неше есеге көп төлеўге разы абитуриентлер анықланғаннан соң жоқарыдағы көрсеткишлер өзгериўи мүмкин.

  1. Тек қарақалпақстанлылар ғана мәмлекетлик грантта оқыўы мүмкин

Ташкент педиатрия медицина институтының Нөкис филиалы быйыл 6 бағдар бойынша 285 студент қабыллайды. Ал, жаңадан ашылған фармация ҳәм стоматология факультетлери есабынан және 80 (25 мәмлекетлик бюджет ҳәм 55 төлемли-контракт тийкарында) студент қосымша қабыл етиледи.

Быйылғы жаңалықлардан бири филиалға ҳүжжет тапсырған абитуриентлердиң арасынан тек ғана қарақалпақстанлы жаслардың мәмлекетлик грант тийкарында оқыўға қабыл етилиўи режелестирилген.

  1. ҚМУ ең көп студентти өз қушағына алады.

Бердақ атындағы Қарақалпақ мәмлекетлик университетине быйыл 2200 студент қабыл етиледи.

Бул жоқары оқыў орнында быйыл жаңадан төмендеги  қәнигелик бағдарлары ашылды:

  1. Энергетика
  2. Метрология, стандартластырыў ҳәм өним сапасы менеджменти
  3. Азық-аўқат өнимлерин жетилистириў технологиясы
  4. Технологиялық машиналар ҳәм үскенелер
  5. Дәрилик өсимликлерди жетилистириў

Университеттиң юридика, финанс, экономика, бухгалтерия есабы қәнигеликлеринде быйылғы оқыў жылынан баслап билим алыў тек төлемли-контракт тийкарында әмелге асырылады.

М.ПИРНАЗАРОВА, Қарақалпақстан хабар  агентлигиниң хабаршысы.

http://kknews.uz/kk/554.htmlKKnews.uz

Бөлимлер