Қарақалпақстан Республикасында “бир айна” орайларына 2017-жылда 3188 мүрәжатлар келип түскен

Қарақалпақстан Республикасы Әдиллик министрлигинде Өзбекистан Республикасы Президентиниң 2017-жыл 1-февраль күнги “Исбилерменлик субъектлерине мәмлекетлик хызметлерди көрсетиў механизмлерин жетилистириўге байланыслы қосымша ис-иләжлар ҳаққында”ғы ПҚ-2750-санлы қарары бойынша әмелге асырылған жумыслар ҳаққында мәжилис шөлкемлестирилди.

 

Мәжилиске Қарақалпақстан Республикасы Әдиллик министрлиги, “бир айна” орайлары, мәмлекетлик хызметлерди көрсетиўши ҳәм мәмлекетлик хызметлерди көрсетиўде қатнасыўшы министрлик, мәкеме ҳәм басқа шөлкемлер қатнасты.

 

Мәмлекетимиз тәрепинен исбилерменлик ҳәм киши бизнес субъектлерине бюрократиялық тосықларды сапластырыў, заманагөй талапларға жуўап бермейтуғын рухсат бериў ҳәм лицензиялаў тәртип-қағыйдаларын, статистикалық, финанс ҳә салық есабатларын түптен қысқартыў, оларды усыныс етиў механизмлерин жетилистириў себепли қолайлы исбилерменлик орталығын жаратыў, олар искерлигине кең еркинлик бериў ис-иләжлары избе-излик пенен әмелге асырылып келинбекте.

 

Нызамшылық пенен барлық дәрежедеги мәмлекетлик басқарыў мәкемелери менен өз-ара қатнасларда исбилерменлер ҳуқықларының үстинлиги принцип жәрия қылынды.

 

Өзбекистан Республикасы Президентиниң 2015-жыл 28-сентябрь күнги “Исбилерменлик субъектлерине “бир айна” принципи бойынша мәмлекетлик хызметлерди көрсетиў тәртибин жәнеде жетилистириў ис-иләжлары ҳаққында”ғы ПҚ-2412-санлы Қарарына тийкар барлық район (қала)ларда исбилерменлик субъектлерине «бир айна» принципи тийкарында мәмлекетлик хызметлерди көрсетиўши орайлар 2016-жыл 1-январь сәнесинен өз искерлигин баслады. Шөлкемлестирилген “бир айна” орайлары заманагөй компьютер ҳәм басқа техникалар менен тәмийинленди.

 

Сондай-ақ, усы қарар менен 2016-жыл 1-январьдан баслап тек ғана «бир айна» орайлары арқалы көрсетилетуғын 16 түрдеги мәмлекетлик хызметлер түрлери тастыйықланды.

 

Қарақалпақстан Республикасында “бир айна” орайларына 2016-жыл даўамында исбилерменлик субъектлерине 16 түрдеги мәмлекетлик хызметлерди көрсетиў бойынша 6139 мүрәжат келип түскен болса, 2017-жылдың 5 айы даўамында 3188 мүрәжатлар келип түскен.

 

Бул болса, қаншадан-қанша исбилерменлик субъектлериниң рухсат бериў өзгешелигине ийе болған ҳүжжетлерди алыўда өз қәрежетлерин ҳәм ең бириншиден ўақытларын тежеўге имканият жаратып, тиккелей исбилерменлик пенен шуғылланыўына жәнеде кең имканият жаратылғанлығын көрсетеди.

 

Рухсат бериўши ҳәм лицензиялаў ҳүжжетлерин рәсмийлестириў тараўын түптен реформалаў нәтийжесинде Қубла Корея экономикасының дүнья жүзиндеги биринши онлық қатарына кириўине тийкар болған болса, Ҳиндистанда ишки жалпы өнимниң 3,5 пайызынан 6-7 пайызға шекем өсиўине имкан берген.

 

Алдынғы дүнья жүзлик әмелиятта исбилерменлик искерлиги тараўында рухсат бериўши ҳүжжетлерди рәсмийлестириў төмендегилерди өз ишине алады:

 

- исбилерменлик искерлиги тараўын тәртипке салыўшы норматив-ҳүжжетлерди ислеп шығыўда талапларды унификациялаў, сондай-ақ олардың турақлылығын тәмийинлеў;

 

- тийисли мәкемелер тәрепинен рухсат бериўши ҳүжжетлер ҳәм лицензиялардың электрон реестрин жүритиў;

 

- өнимлердиң қәўипсизлигин тәмийинлеў бойынша мәмлекеттиң қатаң қадағалаўын ийкемлесиўшең стандартлар менен алмастырыў;

 

- усы тараўды тәртипке салыўды басқышпа-басқыш бизнес-ассоциацияларға яки исбилерменлердиң өзлерине бериў;

 

- рухсат бериў тараўын тәртипке салыўшы норматив-ҳуқықый ҳүжжетлерди исбилерменлик субъектлери менен додалаў өткериў арқалы қабыл етиў;

 - усы тараўды тәртипке салыўды әпиўайыластырыў.

Усы тараўдағы избе-из мәмлекет сиясатының және бир айқын мысалы Өзбекистан Республикасы Президентиниң 2017-жыл 1-февраль күнги “Исбилерменлик субъектлерине мәмлекетлик хызметлерди көрсетиў механизмлерин жетилистириўге байланыслы қосымша ис-иләжлар ҳаққында”ғы ПҚ-2750-санлы қарары есапланады.

Усы қарар менен 2017-2020 жылларда басқышпа-басқыш енгизилетуғын, тек ғана “бир айна” орайлары арқалы көрсетилетуғын мәмлекетлик хызметлер дизими тастыйықланды.

 

Тастыйықланған дизимге тийкар 2017-жылдың өзинде қосымша 18 түрдеги рухсат бериўши ҳәм лицензияланатуғын искерлик түрлери енгизилиўи белгиленген болса, кейнинен 2018-2020 жыларда және 68, қосымша жәми 86 мәмлекетлик хызметердиң тек ғана “бир айна” орайлары арқалы көрсетилиўи нәзерде тутылған.

Мәселен усы жылдың 1-июль күнинен фармацевтика искерлигин әмелге асырыў ҳуқықына лицензия, медециналық искерлигин әмелге асырыў ҳуқықына лицензия, ер жетпегенлерге арналған дәри дәрманлардың рекламасын жайластырыўға рухсатнама, Өзбекистан Республикасы сырт ел исши күшлерин тартыўға рухсатнама, өз тармағын жаратыў ҳуқықысыз мағлыўматларды узатыў тармақлары арқалы провайдер хызметлерин көрсетиўге лицензия алыў тек ғана “бир айна” орайлары арқалы әмелге асырылады.

Мәжилис даўамында тараўға тийисли нызамшылықты орынларда турақлы түрде үгит-нәсиятлаў, орынланыўын тәмийинлеў бойынша әмелий усыныслар ортаға тасланды. Түрли пикир ҳәм усыныслар билдирилди, келешектеги ўазыйпалар белгилеп алынды.

Дерек: qoraqalpoq.adliya.uz

Бөлимлер