Шымбай районы прокуратурасының 6 айлық есабаты

Өзбекистан Республикасы Нызамлары, Өзбекистан Республикасы Президентиниң Пәрманлары ҳәм қарарлары, Министрлер Кабинетиниң қарарлары, Өзбекистан Республикасы Бас прокурорының буйрық ҳәм көрсетпелерин орынлай отырып, Шымбай районы прокуратурасы тәрепинен 2017-жылдың 6 айы даўамында нызамлылықты беккемлеў ҳәм оның орынланыўын тәмийинлеў, район аймағында жынаятшылықтың, ҳуқықбузарлықтың алдын алыў мақсетинде бирқатар жумыслар алып барылды.

Мәмлекет ҳәм хожалық басқарыў органлары ҳәмде орынлардағы атқарыў ҳәкимияты органларында нызамшылықтың орынланыўы үстинен бақлаў барысында 4 мәртебе тексериў өткерилип, анықланған нызам талапларының бузылыўы бойынша 3 протест, 7 усыныс келтирилди, келтирилген прокурорлық бақлаў ҳүжжетлери тийкарында 21 шахс интизамий, 23 шахс ҳәкимшилик жуўапкершиликке тартылды. Соның менен бирге нақ пул түсими, биринши дәрежели төлемлер ҳәмде коммунал төлемлер бойынша исленген таллаўлар бул салада жумыслар талап дәрежесинде алып барылмай атырғанлығын көрсетпекте.

2017-жыл 1-январь жағдайына 1541 хожалық жүритиўши субъектлер есапқа алынған болып, соннан 722 исбилерменлик субъектлери болып, соның ишинде бесеўи жумысын ўақтынша тоқтатқан болса, 24 и сапластырылған, 24 хожалық жүргизиўши субъектлер банкрот деп табылған, 8 исбилерменлик субъектлерине жәрдем көрсетилип, жумысын қайтадан тикледи.

2017-жылдың 6 айында жас өспиримлер ҳаққындағы нызамлардың орынланыўы бойынша 9 мәртебе тексериў өткерилип, анықланған нызам талапларының бузылыўы жағдайлары бойынша 12 усыныс келтирилди, келтирилген прокурор бақлаў ҳүжжетлери тийкарында 24 шахс интизамий, 3 шахс ҳәкимшилик жуўапкершиликке тартылды, мәмлекет бюджетине келтирилген зыянды өндириў бойынша судқа 8546,0 мың сумға 3 даўа арза киритилди.

Район ҳәкимлиги жанындағы жас өспиримлер менен ислесиў комиссиясы ҳуқық қорғаў органлары, сондай-ақ кең жәмәәтшилик пенен биргеликте жас өспиримлер арасында ҳуқықбузарлықтың алдын алыў, орынларда оларға тәлим-тәрбия, түсиник жумыслары бойынша бирқанша әмелий ислер алып барылғанлығы нәтийжесинде  жынаят ислеў жағдайлары болмады.

Район ҳәкимлиги жанындағы жас өспиримлер менен ислесиў комиссиясы, ҳаял-қызлар комитети ҳәм басқада кәрхана, шөлкемлер кең жәмәәтшилик пенен биргеликте ҳаял-қызлар, жас өспиримлер арасында ерте турмыс қурыўлардың алдын алыў бойынша бирқанша үгит-нәсият жумыслары алып барылғанлығы себепли жыл даўамында ерте турмыс қурыў жағдайлары жүз бермеди. Соның менен бирге ҳәзирги ўақытта дүнья жүзинде глобал машқалалардың бири болып турған адам саўдасына қарсы гүресиў, оның алдын алыў бойынша үгит-нәсият алып барылмақта.

Соған қарамастан район аймағында жасаўшы пуқаралардың шет еллерге жумыс ислеўге кетип атырған жағдайлары ушыраспақта.  2017-жыл 1-июль жағдайында район аймағында узақ мүддетке 1454 пуқара шығып кеткен, соннан 1093 ер адамлар, 361 ҳаял-қызларды қурайды, булар тийкарынан Қазақстан Республикасы, Россия Федерациясына кеткен. Соннан 3 айға шекем 1151 пуқара, 6 айға шекем 426 пуқара, 1 жылға шекем 373 пуқара, 3 жылға шекем 62 пуқара ҳәмде 3 жылдан артық 103 пуқара сырт елге шыққан.

Узақ мүддетке шығып қайтып келген 426 пуқарадан тек ғана 363 пуқара медициналық көриктен өткерилип, соннан 1 пуқара туберкулёз кеселлиги, 69 пуқарада басқа кеселликлер барлығы анықланып, олардың саламатлығын беккемлеў шаралары көрилмекте. Узақ мүддетке шығып кеткенлерден қайтып келип ҳәм районлық бәнтликке көмеклесиў, ҳәм халықты социаллық қорғаў орайына жумыс сорап мүрәжат еткенлерден 230 пуқара жумысқа орналастырылды.

Алдағы ўақытта прокуратура район ҳәкимлиги, ҳуқық қорғаў уйымлары ҳәм қадағалаўшы органлардың кең жәмәәтшилик пенен биргеликте район аймағында нызамшылықты беккемлеў, нызам талапларының бузылыўларын сапластырыў ҳәмде олардың алдын алыў, сондай-ақ, жынаятшылыққа қарсы гүрести күшейттириў бағдарындағы жумысларды еле де жетилистирип барамыз.

Б.БАЙМАНОВА,

Шымбай районы прокурорының орынбасары, әдиллик киши кеңесшиси.

Бөлимлер