Қарақалпақстанли каратешилер Қырғызстанда болып өтетуғын Орайлық Азия чемпионатына таярлық көрмекте

Өзбекистан каратэ миллий федерациясының Қарақалпақстан бөлими дәслеп 2007-жылы Қарақалпақстан каратэ миллий федерациясы болып ашылды. Соң 2016-жылдан баслап Өзбекистан каратэ миллий федерациясының Қарақалпақстан бөлими болып қайта шөлкемлестирилди. Ҳәзирги ўақытта оған А.Қудайназаров басшылық етип келмекте. Тренерлерден С.Қәлендеров, Б.Бекниязов, З.Алиевалар спортшыларға каратэ сырларын аянбай үйретип киятырған болса, ал, төрешилер коллегиясы баслығы, бөлим хаткери Әжинияз Мәмбеткаримов оларға жақыннан жәрдем берип келмекте.

— 2016-жылы 12-16-август күнлери Португалия мәмлекетинде болып өткен каратэ бойынша жәҳән универсиадасында сайланды командамыз ағзасы, ҚМУ студенти Дастанбек Атабалаев қатнасып, 3-орынды ийеледи,-дейди Ә.Мәмбеткаримов. — Ал, 2016-жылы Баку қаласында болып өткен IV Ислам дослық ойынларында 3-орынды ийелеп, мәмлекетимиз абырайын көтерип келмекте. Жақында ол Қазақстан Республикасының Астана қаласында болып өтетуғын Азия чемпионатына жоллама алды ҳәм жарысқа қызғын таярлықлар көрмекте. Командамыздың және бир ағзасы А.Байжигитова да усы чемпионатқа жоқары дәрежеде таярлық көрмекте...

Бүгинги күнде Қарақалпақстан Республикасы көлеминде мәмлекет тәрепинен сертификат алған 13 тренер бар болып, және 2 тренер мәмлекетлик сертификациядан өткен. Спорт усталары Қарақалпақстанда 500 ден аслам жасларға каратэ сырларын үйретип келмекте.

Соңғы жылларда мәмлекетимизде спортқа кең түрде итибар қаратылып атыр. Аймақларда каратэ спортын раўажландырыў, тренерлер ҳәм спортшылар санын еле де арттырыў ушын тез-тезден семинарлар өткерилмекте. 8-11-июнь аралығында Ташкент ўәлаятының Ширинбулоқ спорт-саламатластырыў базасында тренерлер ҳәм төрешилер ушын арналған семинар болып өтти. Өзбекистан каратэ миллий федерациясы тәрепинен шөлкемлестирилген бул семинарда бизиң командамыз төрешилери ҳәм тренерлери қоңсы ўәлаятлардағы кәсиплеслери менен өз-ара тәжирийбе алмасып қайтты.

Ҳәзирги ўақытта федерация сайланды командасы 2017-жылы август айында Қырғызстанның Ыссықкөл қаласында болып өтетуғын Орайлық Азия чемпионатына қызғын таярлықлар көрмекте. Чемпионатқа тек ғана спортшылар емес, төрешилер қурамы да қатнаспақшы. Олар халықаралық төрешиликке имтихан тапсырып, жақсы нәтийжелер менен қайтыўды алдына мақсет етип қойған.

 

Ж.ИСКЕНДЕРОВ,

Бөлимлер