Халық депутатлары Кегейли районы Кеңесиниң XXІX сессиясы болып өтти

16-июльден баслап Өзбекистан Республикасы Олий Мажлиси Нызамшылық палатасының депутатлары ҳәм Сенат ағзалары, Қарақалпақстан Республикасы Жоқарғы Кеңесиниң депутатлары республикамыздың барлық қала ҳәм районларында болып, сиясий партиялардың жумысларын терең үйренди ҳәм депутатлар менен ушырасып, Президентимиздиң баянаты ҳәм оның мазмун-мәниси менен кең жәмийетшилик ўәкиллерин жақыннан таныстырды.

20-июль күни Кегейли районы ҳәкимиятының мәжилислер залында халық депутатлары районлық Кеңесиниң XXІX сессиясы болып өтти.

Онда Өзбекистан Республикасы Олий Мәжлиси Нызамшылық палатасының депутатлары ҳәм Сенат ағзалары, Қарақалпақстан Республикасы Жоқарғы Кеңеси депутатлары, сиясий партиялардың, министрликлердиң, шөлкемлердиң, кәрханалардың, ҳуқық қорғаў уйымларының басшылары қатнасты.

Сессияда Президентимиздиң баянатынан келип шығатуғын ўазыйпалар бойынша депутатлар ҳәм партия белсендилери өз пикир, усыныслары менен шығып сөйледи. Олар сиясий партиялардың, Халық депутатлары районлық Кеңесиниң, жуўапкер шөлкемлердиң жумысларында ушырасып атырған кемшиликлер менен алда турған ўазыйпаларға кең түрде тоқтап өтти. Парламент ағзалары, сиясий партиялардың ўәкиллери көрсетилип атырған айрықша итибары ушын елимиз басшысына миннетдаршылық билдирип, мәжилисте ҳәр тәреплеме терең тийкарланып берилген әҳмийетли  ўазыйпаларды әмелге асырыў бойынша өз-ара аўызбиршиликте нәтийжели жумыс алып барыў ҳәм белгиленген мақсетлерге ерисиў депутатлық корпустың жуўапкершиликли және мақтанышлы ўазыйпасы екенин атап өтти.

Буннан соң күн тәртибине киргизилген, ҳуқықбузарлықлар профилактикасы ҳәм жынаятшылыққа қарсы гүресиў, халыққа медициналық хызмет көрсетиў, жаслар менен ислесиў бағдарында алып барылып атырған жумысларға байланыслы мәселелер бо­йынша тийисли тараў басшыларының есабы тыңланды.

Күн тәртибиндеги мәселелер бо­йынша Өзбекистан Республикасы Олий Мажлиси Нызамшылық палатасының Спикери Н.Исмоилов  пикир ҳәм усыныслары менен кең түрде шығып сөйледи.

Сессияға Қарақалпақстан Республикасы  Жоқарғы Кеңеси Баслығының орынбасары А.Ҳамраев қатнасты.

Сессияда көрилген мәселелер бо­йынша тийисли қарарлар қабыл етилди.

Бөлимлер