«ВУЗ»ға оқыўға киргиземен» деген жалатайлардан алданып қалмаң

Өзлери таңлаған қәнигеликлери бойынша жоқары оқыў орынларына ҳүжжет тапсырған жаслардың билим сынағына түсетуғын күни де жақынласып қалды. Устазларының берген билимлерин қунт пенен үйренген, терең өзлестирген абитуриентлердиң өзлерине исеними күшли. «Мәмлекетлик грант болмағаны менен шәртнама тийкарында анық киремен» деп исеним менен айта алады. Ал, айырым өзлериндеги бар билимге жетерли исенбеген, әсиресе, бир-еки жылдан берли тапсырып «ешеги жорғаламай» атырған жасларымыз түрли өсек гәплерге қулақ түре береди. Усындай өзлерин шоққа да, отқа да урып жүрген айырым жаслар «таўламашы»лардың  «исенимли» гәплерине, жал­ған ўәделерге алданып, шал­қасынан түскенин ке­йин билип қалады.

Өзбекистан Республикасы Бас прокуратурасы жанындағы Салық, валютаға байланыслы жынаятларға ҳәм жынайый дәраматларды легалластырыўға қарсы гүресиў департаменти Қарақалпақстан Республикасы басқармасы тәрепинен пуқаралардың арзалары ҳәм гүман етилген шахслардың ис-ҳәрекетлери бойынша бирқанша илажлар алып барылып, қатар нызамбузыўшылықлар анықланды ҳәм айы­рым нызамбузыўшылық ҳәрекетлердиң алды алыныўына ерисилди.

Наўайы ўәлаяты, Кармана районы «Akbars Research And Development» жуўапкершилиги шекленген жәмийети баслығы лаўазымында ислеп келген Акбаржан Пулатов Ташкенттеги Турин политехника университети «Энергетика» қәнигелигиниң бакалавр жөнелисин 2015-жылы оқып питкерген. Лекин, жоқары мағлыўматлы екенлигин жасырып, Наўайы кәншилик колледжи дипломы менен Қарақалпақ мәмлекетлик университетиниң «Электротехника» жөнелисине ҳүжжет тапсырып, ҳәрекеттеги нызам талапларының тийисли бөлим ҳәм бәнтиндеги талапларды биле тура қопал рәўиште бузыўға жол қойған.

Пайтахтымыздағы киши районлардың биринен ижараға квартира алып, тестке таярланып атырған А.Пулатов бул жерде Нөкис қаласында туўылған студент жигитлер Ислам Абдираманов ҳәм Нурулла Ниетуллаевлар менен танысады ҳәм «бел аўыртпай» нобай дәрамат арттырыўды гөзлеп жына­йый режелер дүзеди. Солай етип, олар үшеўи С.Ходжаниязованың Бердақ атындағы Қарақалпақ мәмлекетлик университетиниң «Техника» факультетине ҳүжжет тапсырғанынан хабар таўып, оны өзлериниң жоқары лаўазымда ислейтуғын таныслары арқалы мәмлекетлик грант тийкарында оқыўға киргизиўге ўәде етип, исенимине кирип, алдаўшылық жолы менен 15 миллион сум пулларын алып атырған ўақтында ҳуқық қорғаў уйы­мы хызметкерлери тәрепинен усланды...

Әйне күнлери де «жоқары оқыў орнына мәмлекетлик грант тийкарында киргизип беремен, себеби, жоқары лаўазымларда ислейтуғын танысларым бар» дейтуғын, қас пенен көздиң арасында алдайтуғын жалатайлардың жалған ўәделерине исенип, тис-тырнақлап жыйнаған пулларыңызды олардың қолларына салып жүрмең. Оқыўға киргиземен дегенлердиң ҳеш қайсысына исенбең, тек ғана өзиңиздиң үйренген, өзлестирген билимиңизге ғана исениң.

Қуўатбек  ҚУДАЙБЕРГЕНОВ,

Өзбекистан Республикасы Бас прокуратурасы жанындағы СВБЖЖДЛҚ гүресиў департаменти Қарақалпақстан Республикасы басқармасының оператив бөлими инс­пекторы, екинши дәрежели юрист.

Erkinkarakalpak.uz

Бөлимлер