Қарақалпақстан Республикасындағы Халық қабыллаўханасында қабыллаў болып өтти

Өзбекистан Республикасы Президентиниң Қарақалпақстан Республикасындағы Халық қабыллаўханасында Қарақалпақстан Республикасы Жоқарғы Кеңеси Баслығы Муса Ерниязовтың басшылығында халық арасында ушырасып атырған машқалалы мәселелерди анықлаў ҳәм оның шешилиўине әмелий жәрдем көрсетиў мақсетинде қабыллаў болып өтти.

Қабыллаўда Қарақалпақстан Республикасы Жоқарғы Кеңеси менен Министрлер Кеңеси басшылары, барлық министрликлер менен шөлкемлердиң баслықлары, қәнигелери, ғалаба хабар қуралларының хызметкерлери қатнасты.

Ҳүкимет басшыларының, министрликлер менен басқарма басшыларының «Халық пенен пикирлесиў ҳәм инсан мәплери жылы» Мәмлекетлик бағдарламасын әмелге асырыў шеңберинде халық пенен турақлы және ашық-айдын пикирлесиўди раўажландырыў, халықтың турмыс дәрежеси менен сапасын, оның материаллық абаданлығын арттырыў, социаллық сиясатты белсене даўам еттириў шеңберинде турақлы түрде  өткерилип атырған усындай қабыллаўлар өз нәтийжелерин бермекте.

— Көп ўақыттан берли жасап атырған аймағымызды электр энергиясы менен тәмийинлеў бойынша тийисли орынларға  шығып мүрәжат етип атырған едик. Питпегени ушын мине, бүгинги қабыллаўға усы мәселе бойынша келдим. Қабыллаўда мүрәжатым бойынша ҳәкимият пенен аймақлық электр тармақлары кәрханасы басшыларына тапсырма берилди. Олар сентябрь айына шекем питкериледи, деп ўәде етти,-дейди Қ.Сайпов көшесинде жасаўшы пуқара С.Қалменов.

Қабыллаў даўамында 40 қа шамалас пуқараның мүражатлары тыңланды. Олардың көпшилиги жумыс пенен тәмийинлеў, кредит, медициналық, коммуналлық, турмыслық машқалалар,  исбилерменлик пенен шуғылланыў мәселелери дөгерегиндеги питпей турған жумыслары туўралы айтып, жәрдем сорады.

— Мен колледжди усы жылы тамамлаған едим. Жумыс пенен тәмийинлеўде жәрдем сорап мүрәжат еттим. Республикамыз басшыларына рахмет, мени жумыс пенен тәмийинледи,-дейди колледж питкериўшиси Д.Баймуратова.

Қабыллаўда тыңланған мүрәжатлардың көпшилиги сол жерде өз шешимин таўып, айырым мәселелердиң шешими бойынша тийисли мәкеме басшыларына арнаўлы көрсетпелер берилди.

Ә.Жиемуратов,

Қарақалпақстан хабар агентлигиниң хабаршысы

Бөлимлер