Қанлыкөлде фермер ҳәм дийханларға хызмет көрсетиўши информацион – консалтинг орайы өз жумысын баслады

Қанлыкөл районында 2017 – жыл 24 – август күни Өзбекистан Республикасы Ҳүкимети, Бирлескен Миллетлер Шөлкеминиң раўажландырыў жойбары,  ҳәм «Өзбекистан Республикасының қурғақшылық районларындағы дийхан ҳәм фермер хожалықларының климаттың өзгериўине бейимлестириў жойбары» қоспа дәстүри жәрдеминде фермер хожалықларына информацион – консалтинг хызметин көрсетиўши «Коnsawt Markaz» ЖШЖ орайы иске түсти.

Бул орайдың тийкарғы мақсети – районда жумыс алып барып атырған фермер ҳәм дийхан хожалықларына климат өзгериўине бейимлесиў, қурғақшылық жағдайда аўыл хожалығы жумысларын алып барыў, зүрәәтлиликти асырыў, фермер хожалығын басқарыўда заманагөй технологиялардан пайдаланыў, кредит алыўда бизнес реже дүзиў, бухгалтериялық жумысларын жолға қойыў ҳ.т.б. бағдарларда консалтинг ҳәм информацион хызметлерди әмелге асырыў болып табылады.

Жойбар тийкарында берилген әсбап-үскенелер жәрдеминде инновацион хызметлер яғный егислик жерлердиң шорланыў ҳәм ығаллылық дәрежесин анықлаў имканияты пайда болды. Бул өз гезегинде район фермерлери ушын егис мәўсиминде өз жумысларын оптималластырыў, зүрәәтлиликти асырыўға жәрдем етеди.

 Орайда фермерлик ҳәм бизнес дәстүрлери бойынша киши китапхана шөлкемлестирилди.

 Буннан тысқары, жақын күнлерде фермерлерди оқытыў бойыншада жумыслар әмелге асырылады.

Орайдың алдына қойылған және бир мақсет – колледж оқыўшыларын ҳәм жасларды фермерлик тараўына ҳәм өз бизнесин ашыўға қызықтырыў болып табылады. Бул бойынша Өзбекистан Республикасы «Жаслар аўқамы»ның Қанлыкөл районлық кеңеси менен бирге жумыс алып барыў режелестирилмекте.

 

 

Бөлимлер