Шаққан, кирисимли ҳәм талапшаң қызбан. Неге...

– Сәлем бердик, Кемпир апа! Мен жоқары мағлыўматлы, жоқары лаўазымлы қызбан. Жоқары оқыў орнына өз күшим менен кирдим ҳәм оны қызыл диплом менен питкердим. Кейин, жумысқа да ҳеш кимниң көмегисиз өз саўатым менен кирдим. Шаққан, кирисимли ҳәм талапшаң қызбан. 

Негедур турмыстан бахтым шаппай жүр. Изиме түскен, жақынларым таныстырған жигитлер менен 1-2 рет ушырасаман – изи жоқ. Өзим де түсинбеймен. Сыртқы көринисимнен ҳеш ким кемшилик таппайды. Илажы барынша адамлар менен жыллы мүнәсибетте боламан. Мен де өз хожалығым, бала-шағам болыўын қәлеймен. Ҳәр бир қыздың бахты, арзыўы – усы емес пе? Маған қандай мәсләҳәт бересиз? 

Алдыннан рахмет, Гүлпаршын

– Сәлем Гүлпаршын қызым, қәлеген қыз бала өмириниң сеникиндей болыўын қәлейди. Жоқары оқыў орны, қызыл диплом, карьера, жоқары лаўазым… Бирақ, олар бул жолдың еркеклердики екенлигин билмейди. Айтқаның менен де түсинбейди. Ақыбети – сениң өмириң. Ҳәмме нәрсең бар – тек бахытлы емессең. Ҳаялдың бахты – шаңарақ! Сонлықтан, қәлеген ҳаял-қыздың ең биринши мақсети – оқыў, карьера… емес, ал шаңарақ екенлигин умытпаўымыз тийис. Мен “ҳаял-қызлар оқыма-сын, жумыс ислемесин” деп атырғаным жоқ. «Дәслеп оқып алайын, жумыс ислеп алайын – кейин турмысқа шығаман» деп жүргенде жасың 25 тен өтип кете-ди. Кейин қандай атақ алатуғыныңды өзлериңиз билесиз. Ҳаял-қызлар кейин деместен, имканы болыўдан пайыты келгенде турмысқа шыққаны мақул. 

Гүлпаршын қызым, саған сондай тәрбия берилген яки сенде сон-дай өмирлик жоба бар – бул тек еркек адамға тән. Сенде жигитлеримизге жетиспей атырған еркеклик қәсийетлер бар – «шаққан, кирисимли ҳәм талапшаң». Ҳәр бир адамда еки – еркеклик ҳәм ҳаяллық басламалар болады. Өзи тәбиятымыз бойынша, ер адамларда еркеклик, ал ҳаял-қызларда – ҳаяллық басламасы басым болыўы лазым. Керисинше де болып атыр. Сениң өмириң буған мысал. 

Турмыста барлық нәрселер екиге бөлинген – оң-шеп, плюс-минус, еркек-ҳаял… Олар орынлары менен алмасып кетсе – нәтийже басқаша болып шығады. Кеўилдегидей емес, унамсыз дегендей. Гүлпаршын қызым, мысалы, саған өзин ҳаялларша тутып атырған жигитлер унай ма? Ал, сен өзиңди еркеклерше тутып атырсаң, бирақ бул саған билинбейди. Буны жигитлер көрип турыпты ҳәм бул оларға унамайды. Саған үйленбекши болатуғын жигит сеннен әдеўир озық болыўы керек. Өйткени, ол ертең сени басқарады. 
Қулласы, Гүлпаршын қызым, сениң тәбиятыңда еркеклик баслама үстем болып алған ҳәм сен ҳәрекет етип, өзиңде ҳаяллық басламаны үстем етиўиң керек.

Буның илажы бар ма? Әлбетте бар. Ҳаял болып үйрен. Сениң сыпатларың, қәсийетлериң ҳаялларға тән болсын. «шаққан, кирисимли ҳәм талапшаң» болма, ал мүлайым, мийирман, ғамхор, кишипейил, сабырлы, хызметшил, миймандос, үй бийкеси… болып үйрен. Усыларға әмел ете алсаң, сениң тәғдириңде унамлы өзгерислер жүз бере баслайды. Исен маған.

Дерек: saza.uz

Бөлимлер