Жас исбилерменлер сыйлықланды

Бүгинги күнде елимизде жеке исбилерменлик ҳәм киши бизнести раўажландырыўға үлкен дыққат қаратылып, мәмлекетлик бағдарламалар тийкарында тараўда нәтийжели жумыслар әмелге асырылмақта. Жыл сайын тараўдың ҳуқықый тийкарлары жетилистирилип, исбилерменлерге ҳүкиметимиз тәрепинен жаратылып атырған имканиятлар ҳәм жеңилликлер кеңейт­тирилмекте.

Жақында Өзбекистан жаслар аўқамы Қарақалпақстан Республикалық Кеңесинде Өзбекистан Саўда-санаат палатасы Қарақалпақстан Республикасы басқармасы, Қарақалпақстан Республикасы Бәнтлик ҳәм мийнет қатнасықлары министрлиги, Орта-арнаўлы кәсиплик билимлендириў басқармасы, ӨзЛиДеП сиясий Кеңеси атқарыў комитети ҳәм республика Фермерлер Кеңеси тәрепинен   «Ўатанымның раўажланыўына мениң үлесим» сүрени астында республикамыздағы жас исбилерменлер тәрепинен ислеп шығарылып атырған өнимлер көргизбеси болып өтти.

Оған жас исбилерменлер, колледж питкериўшилери, сондай-ақ, мәҳәллелердеги өз бизнесин басламақшы болған жаслар қатнасты.

Илаждың ашылыў салтанатында шөлкемлестириўши министрлик ҳәм мәкемелердиң жуўаплы хызметкерлери шығып сөйлеп, жасларды исбилерменликке қызықтырыў, олар арасында ҳуқықбузарлықлардың алдын алыў, қәбилетли жасларды хошаметлеў ҳәм ҳәр тәреплеме қоллап-қуўатлаў бойынша ҳүкиметимиз тәрепинен жаратылып атырған кең имканиятлар жөнинде айтып өтти.

Көргизбе соңында жеке исбилермен Ж.Срашова (Нөкис қаласы) биринши, «Румол дизайн Нукус» жеке фирмасы баслығы З.Давранова (Нөкис қаласы) екинши, «Кристал мега стар» кәрханасы баслығы Б.Халиков (Төрткүл районы) үшинши орынларды ийеледи ҳәм шөлкемлестириўшилер тәрепинен баҳалы саўғалар менен сыйлықланды.

 

Р.АРЗИЕВ.

Бөлимлер