Шоманайда таза спорт залы оқыўшыларға саўға етилди

Елимиз бойлап өткерилген ғәрезсизлик байрамының 26 жыллық мерекеси қарсаңында 29-август күни район орайындағы 16-санлы мектептиң спорт залы реконструкцияланып, оңланып, мектеп жәмәәтине саўға етилди.

Мәмлекетлик бюджеттен 606 миллион сум қәрежет жумсалып Мурат Сейтназаров басқарған «Кегейли қурылыс монтаж» қурылыс кәрханасы тәрепинен өз мүддетинде қурылысы жуўмақланған спорт залдың салтанатлы ашылыў мәресими өткерилди.

Салтанатлы мәресимге келген мийманларды мектеп жәмәәти халқымыздың салт-дәстүрине сай нан-дуз бенен күтип алды. Соңынан қурылысы жуўмақланып заманагөй түрде үскенеленген залдың босағасына тартылған лента салтанатлы жағдайда кесилди.

Зал ишинде өткерилген мәресимди районлық ХБМХМТҳШБ баслығы Өмирзақ Султамуратов басқарып барды.

Район ҳәкими Бахадир Янгибаев салтанатлы мәресим қатнасыўшыларын ҳәм мектеп жәмәәтин заман талабы тийкарында оңланған спорт залының иске түсирилиўи менен қутлықлады ҳәм келешекте халық перзентлери арасынан жәҳән чемпионлары шыға бериўине тилеклеслик билдирип, усындай уллы ислердиң басында болып атырған ҳүрметли Президентимизге алғыс сезимлерин билдирди.

Мәресимде нураный устаз Базарбай Бердимуратов ҳәм Рыс Муртазаева, мектеп директоры Медет Сейфуллаевлар жас әўладқа көрсетип атырған ғамхорлығы ушын Президентимизге, район ҳәкимине, қурылыс оңлаў жумысын сапалы питкерген қурылысшыларға өз миннетдаршылығын билдирди.

Соңынан мектеп оқыўшыларының спорт ойынларына старт берилди. Мийманлар жаңадан оңланған гимнастика залы ҳәм жас әўладтың спорт пенен шуғалланып саламат болыўы ушын жаратылған имканиятлар менен танысып, спорт зал имаратын көзден кеширди. Мәресим соңында район ҳәкими Бахадир Янгибаев жаңадан оңлаўдан шығарылған мектептиң мәжилислер залында мектеп жәмәәти менен ушырасыў өткерип, олардың усыныс-тилеклерин тыңлады.

  

Дерек: shomanay.rk.uz

Бөлимлер