Канлыкөл районында «Ең шаққан аўыл пуқаралар жыйыны» жарысларының алдыңғы теримшилерине саўғалар тапсырылды

Өзбекистан Республикасы бойлап «ПАХТА-2017» сүрени менен орынларда жасларға республикалық мекеме ҳәм кәрханалар, жәмийетлик шөлкемлер менен мәденият тараўы хызметкерлери ҳәм эстрада қосықшылары тәрепинен теримшилерди хошаметлеў ҳәм қоллап-қуўатлаў мақсетинде бир қанша илажлар әмелге асырылып атыр.

Республикалық көркем-өнер дөретиўши жәмийетлери бирлеспесиниң қосықшыларынан У.Дошбаев, А.Дәўлетбаев, Г.Сейтовалар топары усы жыл 28-сентябр күни Қанлыкөл районы теримшилерине руўхый ҳәм мәдений заўық бағышлаў мақсетинде, район аймағындағы пахтакешлерге ҳармасынға атыз басына барды.

Республикамыздың пахта қырманына өзлериниң үлесин қосып атырған аймақ халқының пахта териминде белсендилик пенен қатнасып атырған теримшилериниң мийнетин баҳалаў, аймақ теримшилериниң арасында пахта теримине қызығыўшылығын арттырыў мақсетинде, район ҳәкимшилиги ҳәм Жаслар аўқамының районлық бөлими тәрепинен «Ең шаққан теримши» жарыслары шеңберинде «Ең шаққан аўыл пуқаралар жыйыны» атамасында, призге телевизор, микротолқынлы печь пенен утюг қойылып, райондағы 11 аўыл ҳәм мәкан пуқаралар жыйынлары арасында жарыслар шөлкемлестирилди.

Жарыс жуўмағында 1-орынды «Жайҳун» 2 ҳәм 3-орынларды «Жаңа қала» менен «Қанлыкөл» аўыл пуқаралар жыйынлары ийеледи ҳәм приз бенен сыйлықланды, басқа алдыңғы теримшилерге баҳалы саўғалар тапсырылды.

Районымызда «ПАХТА-2017» сүрени менен аўыл пуқаралар жыйынлары аймақларындағы фермер хожалықлары пахта атызларында мәмлекетимиз қырманына өз үлесин қосып атырған теримшилерге, жарыс қатнасыўшыларына республикалық мәденият тараўы хызметкерлериниң концерт бағдарламасы инам етилди.

Илажда Қарақалпақстан Республикасының Министрлер Кеңеси баслығы Қ.Сариев, район ҳәкими М.Қосназаров ҳәм районлық ишки ислер бөлими басшылары менен тийисли тараў басшылары қатнасты.

Дерек: qonlikol.rk.uz

Бөлимлер