Жоқарғы Кеңес Баслығы АҚШның Өзбекистан Республикасындағы Айрықша ҳәм толық ҳуқықлы елшисини қабыл етти

Өзбекистан Республикасы менен Америка Қурама Штатлары арасындағы дипломатиялық байланыслар 1992-жылдың февраль айында орнатылып, еки ел бирге ислесиўиниң ҳуқықый тийкарын алпыстан аслам ҳүжжет, соның ишинде 2002-жылы қол қойылған Стратегиялық шериклик ҳәм бирге ислесиў тийкарлары ҳаққындағы декларация қурайды. Узақ мүддетли ҳәм ҳәр тәреплеме байланыслар тең ҳуқықлылық, конструктивлик бирге ислесиў ҳәм өз-ара мәпдарлық руўхында избе-излилик пенен раўажланбақта. 
Бүгинги күнде еки ел арасында экономикалық байланыслар избе-излилик пенен раўажланып, өз-ара саўда сатық көлеми турақлы өспекте. АҚШ тың «General Motors» корпорациясының елимиздеги жемисли жумысы бул тараўдағы табыслы бирге ислесиўдиң айқын мысалы болып табылады. Стратегиялық шериклик шеңберинде Әндижан, Хорезм ўәлаятлары ҳәм Ташкент қаласында жоқары технологиялы үш ири жойбар әмелге асырылмақта. Елимизде АҚШ тың дүньяға белгили «Boeing», «Lockheed Martin», «Honeywell» ҳәм басқа да компаниялары нәтийжели бирге ислесип келмекте.Өткен жылдың өзинде еки ел арасындағы бирге ислесиў байланысларын және де кеңейтиў мақсетинде Америкадан көплеген абыройлы делегациялар елимизде сапарда болды.
АҚШ Халықаралық раўажланыў агентлиги (USAID) менен Өзбекистан арасында аўыл хожалығы ҳәм азық-аўқат санааты тараўларын раўажландырыў ҳәм потенциалын буннан былай да арттырыў бағдарында бир қатар ислер алып барылмақта. Илим ҳәм технологиялар саласы да еки ел арасындағы бирге ислесиўди кеңейтиўдиң ең перспективалы бағдарларынан есапланады. 
Усы жыл 31-май күни Қарақалпақстан Республикасы Жоқарғы Кеңесиниң Баслығы М.Ерниязов Америка Қурама Штатларының Өзбекистан Республикасындағы Айрықша ҳәм толық ҳуқықлы елшиси Памела Спратленди қабыл етти. 
Республикамыз басшысы елши ханымды республикамызға сапары менен қызғын қутлықлап, Өзбекистан ҳәм АҚШ арасындағы ҳәр тәреплеме байланыслардың барған сайын раўажланып атырғанын, соның ишинде АҚШ ҳүкиметиниң қаржыландырыўында республикамыздағы регионаллық диагностикалық лабораториясының пайдаланыўға тапсырылып атырғанын ҳәм ол халқымыз ийгилигине хызмет ететуғын атап өтти. 
Өз гезегинде Памела Спратлен жыллы жүзлилик жағдайында күтип алғаны ҳәм миймандослығы ушын республикамыз басшысына миннетдаршылық билдирди ҳәм еки ел арасындағы байланыслардың алдағы ўақытлары да раўажлана беретуғынына үмит билдирди.
Қабыллаў мәресимине Қарақалпақстан Республикасы Жоқарғы Кеңеси Баслығының орынбасары А.Хамраев қатнасты. 
Америкалы мийманлар Қарақалпақстан регионаллық диагностикалық лабораторияның ашылыў мәресимине қатнасты ҳәм оның жумыс ислеў процесси менен танысып шықты. Сондай-ақ, мийманлар И.В.Савицкий атындағы Қарақалпақ Мәмлекетлик көркем-өнер музейинде болып, ол жердеги бийбаҳа экспонатларды тамашалады. 
Усы күнниң өзинде мийманлар Нөкистен Ташкентке жөнеп кетти. 
 

Н.РЕЙПНАЗАРОВ,
Қарақалпақстан хабар агентлигиниң хабаршысы

Бөлимлер