Әмиўдәрьяда жаңа баслық сайланды

Бүгинги күнде Өзбекистан Республикасы Конституциясының 105-статьясына муўапық елатлы пунктлерде, аўыл ҳәм мәҳәллелерде пуқаралар жыйынларына, өзин-өзи басқарыў уйымларына жаңа мүддетке жыйын баслықлары (ақсақаллары) ҳәм олардың кеңесгөйлерин сайлаў мапазы жуўмақлаўшы басқышына кирмекте. Әмиўдәрья районындағы «Назархан» аўыл пуқаралар жыйыны алты елатлы пунктке бөлинип, онда қарақалпақ, өзбек, қазақ миллетлерине тийисли 654 шаңарақ ағзалары беккем аўызбиршиликте жасап келмекте.
«Пуқаралар жыйынлары баслықларын (ақсақаллары) ҳәм олардың кеңесгөйлерин сайлаў ҳаққында»ғы Өзбекистан Республикасы Нызамының 15-статьясына муўапық «Назархан» АПЖ сында да сайлаў шөлкемлескенлик жағдайында болып өтти. Сайлаў ҳуқықына ийе 62 ўәкил ашық даўыс бериў жолы менен бурын «Нурлы жол» фермер хожалығының баслығы болып ислеп келген Кеңес Дәўлетяровты «Назархан» АПЖ баслығы етип сайлады. Сондай-ақ, аймақ баслығының кеңесгөйлери де жаңа мүддетке сайланып, оларға халық үлкен исеним билдирди. 
- Сайлаў Нызам талапларына сай өткерилди,-дейди усы жыйынның диний ағартыўшылық ҳәм руўхый-әдеп-икрамлылық тәрбия мәселелери бойынша мәсләҳәтшиси, халық депутатлары районлық Кеңестиң депутаты Гүлжаҳан Ибраимова. – Бүгинги күнде «Назархан» аўылында 3 мың 600 ден аслам халық тыныш-татыў, үлкен аўызбиршиликте жасап келмекте. Бизиң мақсетимиз саламат ҳәм руўхый бай орталықты қәлиплестириў, тынышлық ҳәм турақлылықты сақлаў, абат ҳәм абадан турмыс шараятын жаратыў болып табылады. Шаңарақлық ҳәм жеке исбилерменликке қаратылып атырған итибардың нәтийжесинде аймағымызда 20 дан аслам пуқара исбилерменлик пенен шуқылланып келмекте. Аймақтағы «Қуламет үй» аўылындағы Қытай технологиясына тийкарланған гербиш заводында 50 ге шамалас жас жигит жумыс ислейди. Буннан тысқары аймақта 15 қыз устаз-шәкирт дәстүри тийкарында тигиўшилик ҳәм тоқымашылық сырларын шеберлик пенен меңгермекте. АПЖға тийисли 21 фермер хожалығы тийкарынан пахташылық пенен шуғылланады. Аймақ халқына 1 аўыллық шыпакерлик пункти, 1 азық-аўқат дүканы, 3 орта мектеп ҳәм 1 бала бақша хызмет етип атыр. Байрамларда жәрдемге мүтәж жеке баслы ҳәм майып қарияларға қайырқомлық жәрдемлер көрсетилип, олардың кеўиллерин көтериў нийетинде саўғалар турақлы рәўиште тапсырылып келмекте. Аўыл жасларының спортқа деген қызығыўшылығы барған сайын артып бармақта. Аймағымыздағы спорт-саламатландырыў секцияларында 120 дан аслам бала спорттың футбол ҳәм басқа да түрлери менен шуғылланып атыр. 
Болып өткен сайлаўда жаңадан сайланған пуқаралар жыйыны баслығы ҳәм оның кеңесгөйлери елимиздиң гүллеп жаснаўын ҳәм халқымыздың абадан турмысын тәмийинлеўде өзлериниң күш жигерин, билимин, уқыбын және тәжирийбелерин аямайды деп исеним билдирип қаламыз.
 

Н.РЕЙПНАЗАРОВ,
Қарақалпақстан хабар агентлигиниң хабаршысы

Бөлимлер