Қанлыкөл районында «Китаплар фестивалы» байрам акциясы өткерилди

Президентимиздиң 2017-жыл 13-сентябрь күнги «Китап өнимлерин басып шығарыў ҳәм тарқатыў системасын раўажландырыў, китап оқыўды ҳәм китапқумарлық мәдениятын арттырыў және үгит-нәсиятлаў бойынша комплексли илажлар бағдарламасы ҳаққында»ғы қарары ҳәмде усы жыл 5-июль күнги  «Жасларға байланыслы мәмлекетлик сиясаттың нәтийжелилигин арттырыў ҳәм Өзбекистан Жаслар аўқамының жумысын қоллап-қуўатлаў ҳаққында»ғы Пәрманында оқыў орынлары менен мәденият үйлеринде, жаслардың китап оқыўды ҳәм китапқумарлық мәдениятын арттырыўға қаратылған «Ең жақсы китапқумар», «Зийрек китапқумар», «Ең жас китапқумар» таңлаўлары менен «Балалар китаплары» ҳәм «Китаплар байрамы» сыяқлы илажлар, ушырасыўлар, шеберлик сабақларын турақлы түрде шөлкемлестириў белгиленген еди.

Усындай илажлар шеңберинде, усы жыл 23-ноябрь күни Қанлыкөл районында «Баҳытлы» халықтың мәдений дем алыў майданшасында, район ҳәкимлиги менен Өзбекистан Жаслар аўқамының районлық Кеңеси тәрепинен «Китаплар фестивалы» байрам акциясы шөлкемлестирилди.

Акцияның тийкарғы мақсети — халықтың барлық қатламлары, әсиресе, жаслар ҳәм оқыўшылар арасында китап оқыўға қызығыўшылықты ҳәм китапқумарлық мәдениятын арттырыў, үгит-нәсиятлаўға қаратылған.

Илажлар даўамында мектепке шекемги билимлендириў мекемелери тәрбияланыўшылары арасында қарақалпақ, өзбек, рус, инглис тиллеринде Ўатан, китап, устазлар хаққында қосық ҳәм тақмақ айтыў, балалар ушын интеллектуал конкурслар болып өтти.

Район аймағындағы улыўма билим бериў мектеплери оқыўшылары арасында белгили шайырларымыздың дөретпелеринен «Қосықлар гүлдәстеси» атамасында қосықлар жарысы, түрли миллет ўәкиллериниң таңламалы китаплары тийкарында «Зийрек китапхан» интеллектуал ойынлар  ҳәм жас художниклердиң таңлаўлары  өткерилди.

Сондай-ақ, китап саўдасы менен шуғылланыўшы исбилерменлер тәрепинен жаңа китаплар саўдасы шөлкемлестирилди ҳәм Мәлимлеме-ресурс орайлары тәрепинен шөлкемлестирилген «Әдебий китаплар мүйеши»нде түрли  китаплар алып оқыў имканияты жаратылды.

Фестиваль даўамында 19-санлы Музыка ҳәм көркем-өнер мектеби тәрбияланыўшыларының концерт бағдарламасы ҳәм «Жайҳун тамашасы» цирк шоу  тамашалары көрсетилди.

 

 

 

 

 

 

 

 

 

Дерек: qonlikol.rk.uz

Бөлимлер