Шавкат Мирзиёев Қарақалпақстанда фармацевтика плантацияларын шөлкемлестириў ҳәм жетистириў жойбары менен танысты

"Пахтаны пайда берсе де, бермесе де еге бериў ўақты өтти. Пайда бермеди ме, басқа егин егиў керек. Мысалы, боян тамыр бул жер ықлымы ҳәм шәраятына сай келеди. Солай екен, не ушын оны көбейтиўди жолға қоймаўымыз керек", - деди Шавкат Мирзиёев. Бул ҳаққында ЎзА хабар бермекте.

Шымбай районындағы «Lanextrakt» қоспа кәрханасында боян тамырынан экстракт ислеп шығарылады. Кәрханада жылына 30 мың тонна боян тамыры қайта исленип, 1,3 мың тонна экстракт таярланады. Қытайлы инвесторлар менен биргеликте шөлкемлестирилген кәрханада 200 жумыс орны жаратылған.

Президентимиз Қарақалпақстан Республикасында фармацевтика плантацияларын шөлкемлестириў ҳәм жетистириў жойбары менен де танысты. Мәмлекетимиз Басшысының 2017-жыл 3-майдағы “Нукус-фарм”, “Зомин-фарм”, “Косонсой-фарм”, “Сирдарё-фарм”, “Бойсун-фарм”, “Бўстонлиқ-фарм” ҳәм “Паркент-фарм” еркин экономикалық зоналарын шөлкемлестириў ҳаққында»ғы пәрманы орынланыўы бойынша Қарақалпақстан Республикасында кең көлемли жумыслар әмелге асырылып, бар болған ислеп шығарыў имканиятлары ҳәм ресурслар потенциалынан нәтийжели пайдаланыў арқалы жумыс орынлары жаратыўға айрықша итибар қаратылмақта.

Аймақта фармацевтика санаатын раўажландырыў жөнелисинде 2018-2019-жылларда қуны 27 миллион долларға тең 17 жойбар әмелге асырылыўы режелестирилген. Бул жойбарлар шеңберинде 37 түрдеги фармацевтика өнимлери ислеп шығарылады ҳәм олардың белгили бөлеги экспорт етиледи.

Нөкис қаласындағы  «Нукус Мед Тех» ЖШЖ тәрепинен медициналық буйымлар, «Берлин фарм» ЖШЖ тәрепинен онкологиялық дәрилер ислеп шығарыў жолға қойылады. Төрткүл районында «Төрткүл шийша ыдыслары» ЖШЖда фармацевтика шийша ыдыслары таярналанды.

Президентимизге бул сыяқлы фармацевтикалық өнимлер ислеп шығарыў бойынша жойбарлар усынылады.

Сондай-ақ, жойбарларда целлюлоза ислеп шығарыў ҳаққындағы мағлыўмат да орын алды. Еки басқышта әмелге асырылатуғын бул жойбар қағаз ислеп шығарыўдан таяр өнимлерге шекем болған процессти өз ишине алады.
Қаракалпақстан Республикасында бос турған ҳәм кем қуўат пенен ислеп атырған имарат ҳәм майданлар хатлаўдан өткерилгени ҳаққындағы мағлыўмат тийкарында жаңа кәрханаларды иске түсириў нәзерде тутылып атырғаны айтылды. Сондай-ақ, жойбарларда кем тәмийинленген шаңарақларды жумыс пенен тәмийинлеў бойынша усыныслар орын алған.

Мәмлекетимиз Президенти Шымбай районы белсендилери, зыялылары менен ушырасты. Ушырасыўда бүгин дүньяда жүз берип атырған өзгерислер, халықты қыйнап атырған мәселелер, билимленлириў, медицина системасын жетилистириў бойынша пикир алмасылды.

Аўдарма: makan.uz

Бөлимлер