"Еки районда салы майданларында балық жетистириў технологиясы енгизиледи" - Шавкат Мирзиёев

Қарақалпақстан азық-аўқат санааты тараўында жаңа жойбарлар: Еки районда салы майданларында балық жетистириў технологиясы енгизиледи. Бул ҳаққында ЎзА хабар бермекте. Елбасшымыз Хожели районындағы қурылып атырған заманагөй логистика орайында болды.

Президентимиз Шавкат Мирзиёев усы жылдың январь айында Қарақалпақстанға сапары даўамында усы аймақта логистика орайын қурыў тапсырмасын берген еди.

«Хожели агросанаат орайы» ЖШЖ тәрепинен шөлкемлестирилип атырған бул орай аўыл хожалығы өнимлерин сақлаў, қайта ислеў ҳәм экспорт қылыў менен шуғылланады, ишки базарды аўыл хожалығы өнимлери менен үзликсиз тәмийинлеў, жер майданларын үнемли пайдаланыў, жаңа жумыс орынларын жаратыў, мәмлекетимиз экспорт потенциалын арттырыўға хызмет етеди.

15,3 гектар майданды ийелеген комплексте 2018-жыл 5 мың тонна мийўе-палыз қаплаў, сайлаў ҳәм қайта ислеў имканы жаратылады.150 адам жумыс пенен тәмийинленеди.

Президентимизге бул комплекс ҳаққында толық мағлыўмат берилди.

Бул жерде Қарақалпақстанда азық-аўқат санааты тараўында әмелге асырылатуғын инвестиция жойбарлары, шарўашылық, қусшылық, пал ҳәррешилик ҳәм балықшылықты раўажландырыў бойынша бағдарламалар көргизбеси болып өтти.

Атап айтқанда, 2018-2019-жылларда мийўе-палыз ҳәм гөшти қайта ислеў, музлатқышлар қурыўға байланыслы 70 жойбарды әмелге асырыў режелестирилген. 2018-2020-жылларда шарўашылық ҳәм қусшылықты раўажландырыў бағдарламасы шеңберинде 250 жойбарды турмысқа ендириў нәзерде тутылған. Нәтийжеде 730 дан артық жумыс орны жаратылады. 2018-2020-жылларда балықшылықты раўажландырыў бағдарламасы шеңберинде 6 жойбар орынланады. Нөкис ҳәм Қанлыкөл районларында салы майданларында балық жетистириў технологиясы енгизиледи.

Президентимизге 2018-жыл Қарақалпақстанда қыйтақ жерлерден нәтийжели пайдаланыў бағдарламасы да көрсетилди.

Мәмлекетимиз Президенти бул жойбарлар әҳмийетине тоқталып, оларды еле де жетилистириў ҳәм өз ўақтында әмелге асырыў бойынша тапсырмалар берди.

Аўдарма: makan.uz

Бөлимлер