Қанлыкөл районында өрт қәўипсизлигиниң алдын алыў бойынша тактикалық оқыў шынығыўлары өткерилди

2018-жыл 18-январь күни «Хожели таласы» акционерлик жәмийетиниң Қанлыкөл пахта қабыллаў пунктинде Өрт қәўипсизлиги қәделерин сақлаў ҳәм жүз бериўи мүмкин болған өртлердиң алдын алыў бойынша тактикалық оқыў шынығыўлары өткерилди.

Тактикалық оқыў шынығыўына Қанлыкөл районлық 6-санлы ҳәм Шоманай районлық 5-санлы Кәсиплестирилген Өрт қәўипсизлиги бөлимшеси жеке қурамы ҳәм өрт қәўипсизлиги бөлимшелериниң инспекторлары менен хызметкерлери қатнасты.

Илажда, әмелий тактикалық оқыў шынығыўларының өткерилиў мақсети ҳәм әҳмийети ҳаққында түсиниклер берилди. Оқыў шынығыўында объектлерде өрт өшириў қәделери негизинде, пахта қабыллаў пунктинде жүз берген өртти өшириў илажлары әмелде көрсетилди.

Илаж даўамындағы шынығыўлар барысы, Өзбекистан Республикасы Ишки Ислер Министрлигиниң Өрт қәўипсизлиги институты қәнийгеси лейтенат О.Муталов ҳәм Қарақалпақстан Республикасы Ишки Ислер Министрлиги Өрт қәўипсизлиги басқармасы, Өрт өшириў қуралларын оператив басқарыў топары баслығы капитан Ж.Хожановлар тәрепинен баҳаланды.

Сондай-ақ, илаж барысында Өрт қәўипсизлигине итибар бериў ҳәм қәделерин сақлаў ҳаққында орынларда профилактика илажлары бойынша түсиник жумысларын алып барыў ҳәм де өртти болдырмаў илажларына байланыслы ўазыйпалар белгилеп алынды.

 

 

 

 

 

 

 

 

 

 

 

Бөлимлер