Нөкистеги ярмаркада 553 пуқараға жумысқа жайласыў ушын жоллама берилди (фото)

Усы жылдың 15-ферваль күни Нөкис қаласында Қарақалпақстан Республикасы Жоқарғы Кеңеси, Қарақалпақстан Республикасы Министрлер Кеңеси, Өзбекстан жаслар аўқамы Қарақалпақстан Республикалық Кеңеси, Қарақалпақстан Республикасы Бәнтлик ҳәм мийнет қатнасықлары министрлиги, Орайлық банк Қарақалпақстан Республикасы Бас басқармасы, Қарақалпақстан Республикасы Мәмлекетлик Салық басқармасы, Өзбекстан саўда-санаат палатасы Қарақалпақстан Республикасы басқармасы, Қарақалпақстан фермер, дийқан хожалықлары ҳәм қыйтақ жер ийелери Кеңеси, «Өнермент» бирлеспеси Қарақалпақстан Республикасы басқармасы менен биргеликте «Жаслар – келешек қурыўшысы», «Халқымыз хызметинде болыў ҳәм елимиздиң раўажланыўына үлес қосыў – үлкен бахыт» атамаларында жас исбилерменлер, өнерментлер ҳәм фермерлер тәрепинен ислеп шығарылған миллий өнимлер саўда көргизбеси ҳәмде халықты жаңа жумыс орынлары менен тәмийинлеў бойынша мийнет ярмаркасы өткерилди.

Көргизбеде 121 жас исбилерменлер, өнерментлер ҳәм фермерлер өзлериниң ислеп шығарған өнимлери менен қатнасты.

Қарақалпақстан Республикасы Бәнтлик ҳәм мийнет қатнасықлары министрлиги тәрепинен Нөкис қаласы ҳәм барлық районлардағы мәкеме ҳәм шөлкемлердиң 1000 ға жақын бос жумыс орынлары менен қатнасыўында мийнет ярмаркасы өткерилди. Мийнет ярмаркасы даўамында 553 пуқараға (соннан 174 жаслар, 71 колледж питкериўшилери, 76 ҳаял-қызлар) жумысқа жайласыў ушын жоллама берилди, соннан 254 пуқара (105 жаслар,
11 колледж питкериўшилери, 66 ҳаял-қызлар)
ярмарканың өзинде жумысқа кирип, мийнет шәртнамалары дүзилип, буйрықлары менен таныстырылды.

Илаж шеңберинде саўда ярмаркасы шөлкемлестирилип, пуқаралар өнимлерди арзанластырылған баҳада сатып алыў имканиятына ийе болды.

Көргизбе даўамында Жаслар аўқамы Қарақалпақстан Республикалық Кеңесиниң усынысы менен Орайлық банк Қарақалпақстан Республикасы Бас басқармасы тәрепинен 10 жас фермер, 10 жас исбилермен ҳәм 10 жас өнерментке қайта қаржылаўдан жоқары болмаған пайызда ең кем ис ҳақының 500 есеси муғдарына шекемги суммада жеңиллетилген кредитлер алыў имканиятын бериўши арнаўлы сертификатлар берилди.

Көргизбе шеңберинде Жаслар аўқамының қала ҳәм районлық Кеңес баслықларына 10 жыл мүддетке, жеңиллетилген кредит тийкарында «Президент саўғасы» сыпатында 11 дана «Дамас» ҳәм 4 дана «Спарк» автомобиллери тапсырылды.

Өткерилген илажларға 4 мыңнан артық жаслар (соннан 800 ден артығы жәмлеспеген жаслар) қатнасты.

Қорақалпоғистон янгиликларини телеграмда кузатиб боринг -  https://t.me/kruzuz

Бөлимлер