Шымбайда кредит алып бериў ушын 5 млн сораған банк хызметшиси усланды

Исбилерменлерди ҳәртәреплеме қоллап-қуўатлаў мәмлекетлик дәрежедеги әҳмийетли мәселелердиң бири болып, прокуратура уйымлары хызметкерлери шешилмей атырған мәселелерде оларға жәрдем көрсетип келмекте. Деген менен, «гүриш шигинсиз болмайды» дегендей, базыбир банклердиң лаўазымлы шахслары тәрепинен исбилерменлерден дәмегөйлик етиў жағдайлары еле де ушыраспақта.

Өткен жылы гөш өнимлерин жеткерип бериўге қәнигелестирилген «Парахат-Азамат Сервис» ЖШЖ шөлкемлестирип ҳәм оны өз бас­қарыўына алған Элеонора Айтмуратова «Қишлоқ қурилиш банк» Шымбай районы филиалынан кредит алмақшы болады. Исбилермен усы банктиң лаўазымлы шахслары менен кредит мәселесинде ушырасқанында 100 миллион сум кредит ажыратыў есесине дәмегөйлик еткендей түйиледи. Ол буған ҳайран болып өзиниң танысы А.Низаматдиновқа билдиреди. Өз гезегинде А.Низаматдинов сол банктиң баслығына жақын ағайиншилиги бар Баҳадыр Джуматов пенен сөйлесип көриўди Элеонораға айтады.Солай етип, Шымбайдан А.Низаматдинов Нөкиске келип Б.Джуматовқа кредит алып бериўде жәрдем бериўин қәтере етеди. Б.Джуматов болса өз аяғы менен келген «олжа»дан пайдаланыўды гөзлейди. Себеби,  ол буннан илгериректе де алдаўшылық жынаяты себепли нызам алдында жуўап берген еди. Оннан тийисли жуўмақ шығармаған Б.Джуматов Э.Айтмуратоваға банкке «гиреўге қойылған затларыңыз сораған суммаңызға туўра келмейди екен» деген сылтаў менен узақ пайыт кредит пулын шығарып бермей атырғанын айтады. Сонлықтан да, ол дәмегөйлик жолы менен исбилерменнен пул өндириўди ойлап, банктиң басшылары менен сөйлескен ҳалда кредитти 80 миллион сумға қайта ҳүжжетлестириў мүмкинлигин ҳәм оның хызмет ҳақысы 5 миллион сум болатуғынын билдиреди.

Өз нәўбетинде Э.Айтмуратова бул жағдай ҳаққында ҳуқық қорғаў уйымларына мүрәжат етеди. Ҳуқық қорғаў уйымлары хызметкерлери тәрепинен алып барылған илаж нәтийжесинде Б.Джуматов 5 миллион сум пулды исбилерменнен алған ўақтында қолға алынады. Солай етип, ислеген қылмысы ушын ол тағы нызам алдында жуўап берип, тийисли жазаға тартылды. 

Әлбетте, өз ҳуқықын билген инсан өмирде алжаспайды. Ал, исбилерменликти раўажландырыўға тосқынлық көрсеткен шахслар нызам алдында жуўап беретуғыны анық.

Рахат ЖАҢАБАЕВ, Нөкис қаласы прокуратурасының ис үйрениўши аға тергеўшиси,

Миясар ҚАБУЛОВА, журналист.

Дерек: «Еркин Қарақалпақстан» газетасы

Қорақалпоғистон янгиликларини телеграмда кузатиб боринг -  https://t.me/kruzuz

Бөлимлер