Республикалық ҳаял-қызлар комитети баслығы Зухра Ибрагимова менен интервью

Муқаддес шаңарақты кишкене мәмлекет деп есаплайтуғын болсақ, ҳаял-қызлар сол кишкене мәмлекеттиң уйытқысы, кеўлимиздиң периштеси, үйимиздиң шырағы есапланады. Инсаният пайда болғаннан баслап өмир жалғастырыўшылары болған ҳаял-қызлар, аналар улығланған.

Елимизде ҳаял-қызлардың жәми­йеттеги орнын, абырайын арттырыў, нызамлы ҳуқықларын қорғаў мәмлекетлик сиясат дәрежесине көтерилген. Республикамызда оларға бол­ған итибар, машқалаларына шешим табыў, аналықты ҳәм балалықты қорғаў, имканиятларын жүзеге шығарыў шаңарақ ҳәм жәми­йеттеги орнын белгилеў биринши дәрежели ўазыйпалар қатарында белгиленген. Усы ўазыйпалардың орынланыўы ҳәм халықаралық 8-март ҳаял-қызлар байрамы мүнәсибети менен Қарақалпақстан Республикасы Министрлер Кеңеси Баслығының орынбасары, республикалық ҳаял-қызлар комитети баслығы Зухра  Ибрагимова менен гүрриңлескен едик.

— Зухра Әметовна! Жақында  «Ҳаял-қызларды қоллап-қуўатлаў ҳәм шаңарақ институтын беккемлеў тараўындағы жумысты түп-тийкарынан жетилис­тириў илажлары ҳаққында»ғы Өзбекстан Республикасы Президентиниң Пәрманы қабыл етилди. Усы пәрман талапларынан келип шығып қолға алынып атырған жумыслар ҳаққында айтып өтсеңиз! 

— Ҳаял, ана бар жерде әлем гүлленеди. Ана тәбияттың ояныўы да қүдиретли ҳәм кәраматлы аналардың жаратыўшылығына мегзейди. Әйне бәҳәр ояныў паслының кирип келиўи менен дүнья халықлары ҳаял-қызлар байрамын кеңнен нышанлайды. Мәмлекетимизде жақында қабыл етилген Пәрманда ҳаял-қызлар комитети жумысының төрт жоқары бағдары белгилеп берилди.

Бириншиден, ҳаял-қызларды қоллап-қуўатлаўға байланыслы мәмлекетлик сиясаттың нәтийжели әмелге асырылыўын тәмийинлеў, олардың ҳуқықлары ҳәм нызамлы мәплерин қорғаў, мәмлекеттиң социаллық-сия­сий турмысындағы роли ҳәм искерлигин асырыў.

Екиншиден, ҳаял-қызлардың машқалаларын өз ўақтында анықлап жәрдемге мүтәж ҳәм аўыр аўҳалға түсип қалған ҳаял-қызлардың, анығырағы майыплығы болған ҳаяллардың дизимлерин алып оларға социаллық-ҳуқықый, психологиялық ҳәм материаллық жәрдем бериў.

Үшиншиден, ҳаял-қызлардың бәнтлигин тәмийинлеў, мийнет шараятларын жақсылаў, алыс аўыллардағы жас қызларды шаңарақлық ҳәм жеке исбилерменликке, өнерментшиликке тартыў ҳәм қоллап-қуўатлаў.

Төртиншиден, ҳаял-қызлар арасында ҳуқықбузарлықтың алдын алыў, ҳуқықбузарлыққа бейим ҳәм жазаны орынлаўдан азат етилген ҳаял-қызларды дурыс жолға салыў бағдарында ўазыйпалар белгиленди. Мине бул мәселелер бойынша анық ис-илажлар исленип шығылып жумыслар алып барылмақта.

— Республикамыз ҳаял-қызлар комитетинде әмелге асырылған жумыслар нәтийжесине де тоқтап өтсеңиз!

— Бүгинги күнде республикамызда 3 мың 250 ден зыят ҳаял-қызлар басшылық лаўазымларында жумыс ислеп атыр. Үш Өзбекстан Республикасы Олий Мажлиси Сенаты ағзасы, төрт Олий Мажлис Нызамшылық палатасы, он еки Қарақалпақстан Республикасы Жоқары Кеңеси, 85 ҳаял-қызлар қала ҳәм район Кеңеслерине депутат. 168 илимпаз ҳаял-қызлар илим-пән раўажланыўы жолында нәтийжели мийнет етпекте.

Өткен жылы ҳаял-қызлар ушын 15 мыңнан зыят жаңа жумыс орынлары жаратылды. Киши бизнес ҳәм жеке исбилерменликти раўажландырыўға қаратылған итибар өз нәтийжесин бермекте. Ҳәзирги күнде бул тараўда 8 мыңнан артық ҳаял-қызлар жумыс ислеп атыр.

Район, қала ҳәкимликлери, прокуратура ҳәм бәнтликке көмеклесиў орайлары басламасы менен өткен жыл даўамында 114 мәрте бос жумыс орынлары мийнет ярмаркалары шөлкемлестирилди. Бул мийнет ярмаркаларында 4342 кәрхана, шөлкем ҳәм мәкемелер өзлеринде бар болған 14 мыңнан зыят бос жумыс орынлары менен қатнасты ҳәм 958 ҳаял-қызларға жумысқа жайласыў ушын жолламалар берилди. 

Өзбекстан Республикасын раўажландырыўдың бес стратегиялық ҳәрекетлер бағдарламасын әмелге асырыў бойынша ҳәм быйылғы «Жедел исбилерменлик, инновациялық идея ҳәм технологияларды қоллап-қуўатлаў» жылы Мәмлекетлик бағдарламасы шеңберинде ҳаял-қызларды социаллық қоллап-қуўатлаўға қаратылған көплеген ис-илажлар әмелге асырылыўы белгиленди. «Жыл ҳаялы», «Ең үлгили шаңарақ», «Зульфия қызлары», «100 инновациялық идея», «Нафосат», «Ҳаяллар спорт фестивалы» таңлаўлары өткерилип олардың хызметлери, ибратлы ислери халыққа танылмақта. Хожели районынан исбилермен ҳаял Гүлнара Сариева «Нафосат-2017», Елликқаладан Султановлар шаңарағы «Ең үлгили шаңарақ», Гүлсара Жоллыбекова «Жыл ҳаялы» таңлаўларының жеңимпазлары болды.

Сондай-ақ «Жылдың ең жақсы жуўаплы хаткери» таңлаўының республикалық бас­қышында 2017-жыл жуўмағында ержетпеген жаслар ислери бойынша Хожели районы мәкемелерара комиссиясы жуўаплы хаткери Фарангиз Наранова жеңимпаз болды.

Спортшы қызымыз Зайнаб Дайыбекова Өзбекстан Республикасы тарийхында биринши мәрте спорттың қылышпазлық түри бойынша болып өткен Азия чемпионатында сыйлы 3-орынды ийелеп, Өзбекстан Қылышпазлық федерациясының қарарына бола «Жылдың ең жақсы спортшысы» деп табылды. Амангүл Алланазарова Түр­кияда болып өткен жәҳән чемпионатында  сыйлы 2-орынды, быйылғы жылы февраль айында болып өткен Өзбекстан чемпионатында 1-орынды алған болса, Бишкек қаласында болып өткен Азия  чемпионатында Набира Эсенбаева спорттың «еркин гүрес түри бойынша сыйлы 2 орынды ийеледи. Италияда ҳәм Түркияның Анталия қаласында болып өткен Европа ашық кубогында Нилуфар Ермаганбетова сыйлы 2- орынды алды.

— Байрам тилек­лериңиз!

— Ана меҳир булағынан нәр алған өмиримиз даўамшылары — перзентлеримиздиң камалы менен жайнап жаснаған әзиз аналарымызды, меҳрибан апа-сиңлилеримизди байрам  менен қутлықлайман. Олардың ҳәр бирине саў-саламатлық тилеймен!

Гүрриңлескен:  Бийбижамал  КАРАМАТДИНОВА. erkinkarakalpak.uz

Қорақалпоғистон янгиликларини телеграмда кузатиб боринг -  https://t.me/kruzuz

Бөлимлер