Беруний — Елликқала темир жолында «Нексия» тепловоз бенен соқлығысқан

Ҳеш кимге сыр емес, жол ҳәрекети ҳәдийселери бүгинги күнде ең бир тынышсызлан­дырарлық мәселелердиң бири болып қалмақта. Олардың ең қәўиплиси — темир жол кесиспелеринде жүз беретуғынын бийкарлап болмайды. Себеби, қатты тезлик пенен киятырған поездды бирден тоқтатыў мүмкин емес. Поездлардың түрлерине (жолаўшы, жүк яки жеке локомотив), салмағына, тезлигине, мәўсимге (қыс, гүз, қар, қыраў, жаўын), жолдың профилине (бәлент, ой) қарап, олардың тормозланыў жолы 140-600 метр ҳәм оннан да үлкен болады.

Бүгинги күнде Қарақалпақстан Республикасы бойынша 81 темир жол кесиспеси болып, олардан 50 кесиспе Қоңырат жол аралығы қурамында жайласқан, ал, 2 темир жол кесиспеси (Хожели ҳәм Қанлыкөл районы) қорғалады.

Жоқарыда айтқанымыздай, темир жол кесиспеси қәўипли зона болып, оларда жүк ҳәм жолаўшы поездларының автомобиль транспорт қураллары менен соқлығысыўы ушырасып турады. Мәселен, өткен 2017-жыл даўамында темир жол кесиспелеринде 3 мәрте поезд ҳәм автотранспорт қуралларының соқлығысыўы жүз берген. 16-март күни Беруний — Елликқала темир жол перегонының 555 км. қорғалмайтуғын кесиспесинде 1967-жылы туўылған пуқара Самандаров басқарыўындағы мәмлекетлик белгиси 90 S 164 ЕА болған «Нексия» автомашинасы №51 поезды тартып баратырған машинист Бекмуратовтың басқарыўындағы №026 тепловоз бенен соқлығысқан. 9-август күни болса Беруний — Бадай темир жол перегонының 589 км. қор­ғалмайтуғын кесиспесинде 1976-жылы туўылған пуқара Нурматов басқарыўындағы мәмлекетлик белгиси 01 019 АDА болған «Нексия» автомашинасы №3801 поездын тартып баратырған машинист Искендеровтың басқарыўындағы №041 тепловозы менен соқлығысқан ҳәм 28-сентябрь күни «Назархан» стан­циясы 589 км. қорғалмайтуғын темир жол кесиспесинде мәмлекетлик белгиси 7 466 SА болған «Нексия» автомашинасы №3472 поездын тартып баратырған машинист Нуркебаевтың басқарыўындағы №026 тепловоз бенен соқлығысқан.

Темир жолларда ҳәрекет қәўипсизлигин тәмийинлеў, олардың алдын алыў мақсетинде «Қоңырат темир жол аралығы» кәрханасы тәрепинен бир қанша жумыслар әмелге асырылмақта. Темир жол кесиспелериндеги кемшиликлер көрсетилип, арнаўлы дүзилген ҳүжжетлер тийкарында оларды дүзетиў қатаң талап етилмекте. Пуқаралар арасында жийи-жийи үгит-нәсият ҳәм түсиндириў жумыслары жүргизилмекте. Лекин, усындай илажларға қарамастан, быйылғы жылдың өзинде 2 мәрте темир жол ҳәдийсеси жүз берди.  Булардың бәрин дүзип отырыў шәрт емес.  Сонлықтан республикамыздың барлық пуқараларын атап өтилген темир жол ҳәдийселеринен ти­йисли жуўмақ шығарып, жолларда ҳәрекет қәўипсизлиги қағыйдаларын қатаң сақлаўға шақырамыз.

К.НУРТАЖИЕВ, «Қоңырат жол аралығы» кәрханасы баслығы.

Қорақалпоғистон янгиликларини телеграмда кузатиб боринг -  https://t.me/kruzuz

Бөлимлер