Қарақалпақстан Республикасы: Биринши ярым жыл жуўмақлары

Усы жыл 22-июль күни Қарақалпақстан Республикасы Жоқарғы Кеңесинде 2016-жылдың биринши ярым жыллығында Қарақалпақстан Республикасында экономикалық бағдарламаның ең әҳмийетли ўазыйпаларының әмелге асырылыўы, аймақларды комплексли раўажландырыўды тәмийинлеў, экономика тараўында ири инвестициялық жойбарларды әмелге асырыў, жол-транспорт, инженерлик-коммуникацияларды ҳәм инфраструктураны раўажландырыў, экспортлық болжаўлардың орынланыўын ҳәм экспорт көлемин арттырыў, экономикада мәмлекеттиң қатнасыўы үлесин азайтыў, акционерлик жәмийетлердиң уставлық капиталларына сырт ел инвесторларын тартыў ҳәм корпоративлик басқарыўды раўажландырыў мәселелерине бағышланған мәжилис болып өтти. Мәжилисти Қарақалпақстан Республикасы Жоқарғы Кеңесиниң Баслығы М.Ерниязов кирис сөз бенен ашты ҳәм басқарып барды.
Мәжилиске Қарақалпақстан Республикасы Жоқарғы Кеңесиниң депутатлары, ҳүкимет ағзалары, ҳуқық қорғаў уйымлары, министрликлер менен ведомостволардың басшылары, қала ҳәм район ҳәкимлери, исбилерменлер, ғалаба хабар қуралларының ўәкиллери, сондай-ақ, қала ҳәм район студияларынан ҳәким орынбасарларының басшылығында район белсендилери, тийисли мәкеме ҳәм кәрханалардың басшылары қатнасты.
Онда атап өтилгениндей, 2016-жылдың дәслепки алты айында Президентимиз тәрепинен белгилеп берилген ўазыйпалар тийкарында республикамызды социаллық-экономикалық раўажландырыў бойынша бир қатар нәтийжелерге ерисилди.
Атап айтқанда, тийкарғы макроэкономикалық көрсеткишлер есапланған жалпы аймақлық өним 2 триллион 749 миллиард сумды, яғный 121,2 процент өсим пәтин қурады. 
Өткен жылдың усы дәўирине салыстырғанда санаат өнимлерин ислеп шығарыў көлеми 196 процентке өсип, 1 триллион 883 миллиард сумлық санаат өнимлери ислеп шығарылды. 
Бул тийкарынан «Үстирт-газ-химия комплекси»ниң мүддетинен бурын пайдаланыўға тапсырылып, есап бериў дәўиринде 849 миллиард сумлық өним ислеп шығарыў есабынан болмақта. 
Ҳүрметли Президентимиздиң «Өзбекистан Республикасының 2016-жылғы Инвестициялық бағдарламасы ҳаққында»ғы қарарына муўапық быйылғы жылы Қарақалпақстанда жәми 4 триллион 53 миллиард сумлық инвестицияларды өзлестириў белгиленип, январь-июнь айларында барлық дәреклер есабынан жәми 1 триллион 904 миллиард сумлық инвестициялар өзлестирилди. 
Бунда, Инвестциялық бағдарламаға муўапық 108 социаллық объектлерди қурыў, реконструкциялаў ҳәм капитал оңлаў жумысларына жәми 100 миллиард сумға шамалас қаржы ажыратыў белгиленип, бүгинги күнге бул объектлерде 85 проценттен аслам қурылыс жумыслары жуўмақланып, 65 социаллық объект пайдаланыўға тапсырылды. 
Сондай-ақ, аўыллық жерлерде быйылғы жылда 125 миллиард сумлық қаржы есабынан 668 үлги жойбардағы турақ-жай пайдаланыўға тапсырылады. Буннан тысқары, быйыл социаллық-экономикалық раўажландырыў бағдарламасы тийкарында санаат, сервис ҳәм аўыл хожалығы тараўларында 78 миллиард сумлық 1261 жойбардың әмелге асырылыўы нәтийжесинде 4756 жаңа жумыс орны жаратылды. 
Усы бағдарлама тийкарында ири жойбарлардан есапланған Қараөзектеги нырқы 10 миллиард 600 миллион сумлық ҳәм 17 миллион АҚШ долларына тең жылына 200 мың тонна цемент ислеп шығаратуғын «Титан цемент» кәрханасы жыл ақырында иске түсирилип, 200 ге шамалас жаңа жумыс орны жаратылады. «Үстирт газ-химия комплекси» тәрепинен ислеп шығарылып атырған полипропилен ҳәм полиэтиленнен таяр өним ислеп шығарыў бойынша 37 жойбарға усыныс таярланып, соннан 20 жойбар жергиликлилестириў бағдарламасына киргизилди. Буларға қосымша санаат потенциалын арттырыў мақсетинде бағдарламаларға жойбарларды киргизиў арқалы бәсекиге шыдамлы өнимлерди ислеп шығарыў көлеминиң 1,5-2 есеге өсиўин тәмийинлеў илажлары көрилмекте. 
Бүгинги күнде әҳмийетли мәселелердиң бири болған экспорт имканиятларын және де кеңейтиў бойынша республикамыздың улыўма эксперти өткен жылға салыстырғанда 5,3 есеге өсип, 234 миллион АҚШ долларын қурады. Аймақлық кәрханалардың өнимлер экспорты биринши ярым жыллықта 24,2 миллион АҚШ долларын қурап, реже 152,3 процентке орынланды. Экспорт етиўши кәрханалар қатарына жаңадан 20 кәрхана қосылды. 
Усы жыл 12-16-июль күнлери Ташкентте Халықаралық мийўе-овощ ярмаркасы болып өтип, онда республикамыздан жәми 50 миллион 100 мың АҚШ долларлық 14 шәртнама дүзилди. 
Халықтың бәнтлигин тәмийинлеў, ең дәслеп кәсип өнер колледжин питкериўшилерди жумысқа орналастырыў бүгинги күнниң әҳмийетли талапларының бири болып табылады. Бул бағдарда Бәнтлик бағдарламасы тийкарында есап бериў дәўиринде 22526 жаңа жумыс орны жаратылып, соның 5054 и жаслар ушын шөлкемлестирилди. 
Күн тәртибиндеги мәселелер бойынша бир қатар тараў басшыларының, қала ҳәм район ҳәкимлериниң есаплары тыңланып, оларға тараўларда ушырасып атырған кемшиликлерди сапластырыў, алда турған ўазыйпаларды орынлаў бойынша анық ўазыйпалар белгилеп берилди.
Мәжилисте Өзбекистан Республикасы Бас министриниң орынбасары А.Икрамов қатнасып, қаралып атырған мәселелер бойынша кең түрде шығып сөйледи.
Мәжилиске Қарақалпақстан Республикасы Министрлер Кеңесиниң Баслығы Б.Янгибаев, Өзбекистан Республикасы Мәмлекетлик статистика комитетиниң баслығы Б.Тураев қатнасты.
Мәжилисте қаралған мәселелер бойынша тийисли шешимлер қабыл етилди. 
 

Қарақалпақстан хабар агентлиги

Бөлимлер