Қоңыратта жеңил автомашина поезд пенен соқлығысыўы нәтийжесинде басқарыўшы ўақыя орнында қайтыс болды

Ғәрезсизлик жылларында елимиздиң экономикалық потенциалы жылдан-жылға артып бармақта. Буның нәтийжесинде адамлардың турмыс шараятлары жақсыланып, автотранспорт­лар саны да көбеймекте.

Мине, усынадай раўажланыў шараятында айырым қағыйда бузыўшы транспорт басқарыўшылары темир жол кесиспелеринде жақынласып киятырған поезд ҳаққындағы ескертиў белгилерин көрсе де жолды кесип өтпекши болады. Буның ақыбетинде бахытсыз ҳәдийсе жүз береди ҳәм қағыйда бузыўшылар тек өзлериниң ғана емес, ал, өзгелердиң де өмирине қәўип туўдырады. Темир жолларды кесип өтиў орынлары жол ҳәрекети қатнасыўшыларынан айрықша сергекликти ҳәм қәўипсизлик қағыйдаларына қатаң бойсыныўды талап етеди.

«Ўздавтемирйўлназорат» инс­пекциясының Арал бойы филиалы ҳәм Қоңырат регионаллық темир жол узели тәрепинен бундай кеўилсиз ҳәдийселердиң алдын алыў бойынша бир қатар илажлар ҳәм үгит-нәсият жумыслары алып барылмақта. Лекин, усыған қарамастан, темир жол кесиспелеринде машина басқарыўшылар тәрепинен жол ҳәрекети қәўипсизлиги қағыйдаларын турпайы рәўиште бузыў жағдайлары ушыраспақта. Мәселен, усы жылдың 13-февраль сәнесинде «Қоңырат — Алтынкөл» шақапша жолында жайласқан қорғалмайтуғын темир жол кесиспесинде Қоңырат қаласында жасаўшы, 1988-жылы туўылған пуқара Ф.Гаюповтың басқарыўындағы мәмлекетлик номери 95N 554 DА болған «Нексия» маркалы автомашинасының поезд пенен соқлығысыўы нәтийжесинде басқарыўшы аўыр тән жарақатын алып, ўақыя орнында қайтыс болды. 15-февраль күни болса, «Төрткүл — Еллик­қала» бәндиргилери аралығындағы 551-километрде жайласқан қорғалмайтуғын темир жол кесиспесинде Төрткүл районында жасаўшы, 1981-жылы туўылған пуқара Ж.Султановтың басқарыўындағы мәмлекетлик номери 95К 196 ЕА болған «Нексия» маркалы автомашинаның поезд пенен соқлығысыўы ақыбетинде басқарыўшы аўыр тән жарақатын алып, емлеўханаға жат­қарылды.

Жол-транспорт  ҳәдийселериниң алдын алыў ҳәм жол ҳәрекети қәўипсизлигин тәмийинлеў ушын «Өзбекстан темир жоллары» мәмлекетлик акционерлик темир жол компаниясы Қоңырат регионаллық темир жол узели хызметкерлери биргеликте турақлы түрде автохожалықларда, санаат кәрханаларында, жеке автомашинасы бар пуқаралар арасында, мектеп ҳәм мәкан пуқаралар жыйынларында сәўбетлесиўлер өткерип, түсиндириў жумысларын және де жанландырса, мақсетке муўапық болар еди.

«Жол қағыйдасы — өмир пайдасы». Бул қағыйда ҳәр бир пуқараның, әсиресе, ҳәр бир транспорт бас­қарыўшыларының ҳәмийше ядында турыўы лазым.

 

И.ҚАЛМУРАТОВ,

Өзбекстан Республикасы темир жолларда жүк ҳәм жолаўшылар тасыў

қәўипсизлигин қадағалаў мәмлекетлик инспекциясы Арал бойы филиалы инспекторы. 

Дерек: «Еркин Қарақалпақстан» газетасы

Қорақалпоғистон янгиликларини телеграмда кузатиб боринг -  https://t.me/kruzuz

Қорақалпоғистон янгиликларини facebook'да кузатиб боринг - https://www.facebook.com/groups/kruz.uz/

Қорақалпоғистон янгиликларини instagram'да кузатиб боринг - https://www.instagram.com/kruz.uz/

Қорақалпоғистон янгиликларини odnoklassniki'да кузатиб боринг - https://www.ok.ru/kruz.uz

 

Бөлимлер